یروشلم : فلسطین کے مقبوضہ شہر غزہ میں اسرائیلی جنگی طیاروں کی شدید بمباری کے نتیجے میں تین فلسطینی نوجوان شہید جبکہ متعدد زخمی ہوگئے۔
تفصیلات کے مطابق غاصب صیہونی ریاست اسرائیل کی انتہا پسند افواج کے جنگی طیاروں کی جانب سے گذشتہ روز فلسطین کے شہر مقبوضہ غزہ کے علاقے خان یونس میں بمباری کی گئی جس کے نتیجے میں تین فلسطینی شہری شہید جبکہ متعدد زخمی ہوگئے۔
فلسطینی خبر رساں ادارے کا کہنا تھا کہ اسرائیل کے درندہ صفت فوجیوں کی جانب سے غزہ اور اسرائیل کی سرحد پر موجود شہریوں کو بمباری کا نشانہ بنایا گیا تھا۔
مقامی میڈیا کا کہنا ہے کہ اسرائیلی جنگی طیاروں کی شدید بمباری میں شہید ہونے والے دو فلسطینی نوجوانوں کی عمریں 13 اور 14 برس بتائی جارہی ہے جبکہ تیسرے شہید کی شناخت تاحال نہیں ہوسکی ہے۔
دوسری جانب صیہونی ریاست اسرائیل کی فورسز کے ترجمان کا کہنا ہے کہ جنگی طیاروں کے ذریعے ان فلسطینیوں کو بمباری کا نشانہ بنایا گیا ہے جو غزہ اور اسرائیل کی سرحدی باڑ کو دھماکے سے اڑانے کی کوشش کررہے تھے۔
مزید پڑھیں : اسرائیلی فوج کی فائرنگ سے زخمی ہونے والا فلسطینی شہید ہوگیا
یاد رہے کہ فلسطین میں قابض اسرائیلی فوج کی فائرنگ سے زخمی ہونے والا فلسطینی نوجوان گذشتہ روز دوران علاج دم توڑ گیا تھا۔
مقامی خبر رساں ادارے کا کہنا تھا کہ جمعے کے روز ہزاروں فلسطینی اسرائیلی قبضے کے خلاف ہفتہ وار مظاہرہ کررہے تھے کہ اسی دوران اسرائیلی فوج کی فائرنگ سے ایک فلسطینی نوجوان ’ یحیٰ بدر‘ زخمی ہوگیا تھا۔
غیر ملکی خبر رساں ادارے کے مطابق زخمی نوجوان کا مقامی اسپتال میں علاج جاری تھا تاہم آج زخموں کی تاب نہ لاتے ہوئے شہید ہوگیا۔
مزید پڑھیں : اسرائیلی فوج کی فائرنگ اور شیلنگ سے 5 فلسطینی شہید، 80 زخمی
خیال رہے کہ تین روز قبل ہزاروں فلسطینیوں نے غزہ سرحد پر احتجاج کیا اور اسرائیلی فوج کے خلاف نعرے بازی کی، قابض فوج نے مظاہرین پر آنسو گیس کی شیلنگ اور فائرنگ کی جس کے نتیجے میں 5 فلسطینی شہید 80 زخمی ہوگئے تھے۔
رواں ماہ غزہ کی سرحد پر فلسطینیوں کی جانب سے اسرائیل کے خلاف ہونے والے احتجاج کے دوران اسرائیلی فوج کی فائرنگ سے 3 فلسطینی شہید جبکہ درجنوں زخمی ہوگئے تھے۔
واضح رہے کہ 30 مارچ سے شروع ہونے والی جمعہ احتجاجی تحریک کے دوران اب تک 250 سے زائد فلسطینی شہید اور 30 ہزار کے قریب زخمی ہوچکے ہیں۔
