اسلام آباد: پاکستان نے غزہ پر اسرائیلی حملے کو غیر قانونی اقدام قرار دے دیا۔
تفصیلات کے مطابق غزہ کی پٹی پر اسرائیلی وحشیانہ فضائی حملوں نے تباہی مچا دی ہے، جس سے مجموعی طور پر اب تک 24 فلسطینی شہید ہو چکے ہیں۔
اسرائیل کی غزہ پر وحشیانہ بمباری پر دنیا میں ہلچل مچ چکی ہے، اور کئی ممالک نے حملوں کی شدید مذمت کی ہے، پاکستان کی جانب سے بھی حملہ غیر قانونی اقدام کی مثال قرار دیا گیا ہے۔
ایرانی صدر ابراہیم رئیسی نے حملوں کی شدید مذمت کی جب کہ پاسدارانِ انقلاب کا کہنا ہے اسرائیل کو نہتے فلسطینیوں پر کیے گئے ان حملوں کی بھاری قیمت چکا نا پڑے گی۔
غزہ پر فضائی حملوں کا دوسرا روز، اسرائیل نے 24 فلسطینی شہید کر دیے
سعودی عرب نے بھی غزہ پر ا سرائیل کی فضائی حملوں کی شدید مذمت کی، مصر نے صورت حال کو معمول پر لانے کے لیے ثالثی کی کوششیں شروع کر دی ہیں۔
یورپی یونین اور برطانیہ نے فوری جنگ بندی کا مطالبہ کر دیا ہے، جب کہ روس نے بھی اظہار تشویش کرتے ہوئے جنگ بندی پر زور دیا۔
روسی وزارتِ خارجہ کی ترجمان ماریہ زخاروا کا کہنا ہے کہ روس فلسطین اسرائیل تنازع کے علاقے میں نئے مسلح پُرتشدد واقعات پر تشویش میں مبتلا ہے، فریقین پائیدار جنگ بندی کی طرف واپس آئیں۔
واضع رہے اسرائیل اور حماس کے درمیان 2021 میں 11 روز جنگ ہو چکی ہے جس میں 250 نہتے فلسطینی شہید ہو گئے تھے۔
