لاہور : استحکام پاکستان کے پیٹرن انچیف جہانگیر ترین نے اہم معاملات پر مشاورت کیلیے پارٹی رہنماؤں کا ویڈیو لنک اجلاس طلب کرلیا۔
اس حوالے سے ذرائع کا کہنا ہے کہ لندن میں موجود استحکام پاکستان پارٹی کے سربراہ جہانگیر ترین کی جانب سے تمام پارٹی عہدیداران کو مشاورت اور پارٹی لائحہ عمل کے حوالے سے بلالیا۔
ذرائع کے مطابق جہانگیر ترین لندن سے ویڈیو لنک کے ذریعے اجلاس کی صدارت کریں گے، اجلاس میں پارٹی کو الیکشن کمیشن سے رجسٹرڈ کرانے کے حوالے سے مشاورت ہوگی۔
اجلاس میں پنجاب سمیت ملک کے دیگر صوبوں میں عہدوں کی تقسیم پر مشاورت کی جائے گی، دیگر سیاسی رہنماؤں سے رابطوں کے حوالے سے جہانگیر ترین کو آگاہ کیا جائے گا، استحکام پارٹی کے دیگر شہروں کے رہنما ویڈیو لنک کے ذریعے شریک ہونگے۔
