The news is by your side.

’جعلی بازو‘ پر کرونا ویکسین لگانے کا انجام

روم: اٹلی میں کرونا ویکسین سے کترانے والے ایک شخص نے اپنے ’جعلی بازو‘ پر ویکسین لگانے کی کوشش کی تاہم گرفتار ہو گیا۔

تفصیلات کے مطابق ’جعلی بازو‘ پر ویکسین لگانے کی کوشش میں ایک اطالوی شہری گرفتار کر لیا گیا ہے، پچاس سالہ شہری ویکسین لگوائے بغیر سرٹیفکیٹ حاصل کرنا چاہتا تھا۔

اطالوی حکام کا کہنا ہے کہ شمال مغربی اٹلی میں اطالوی شہری جب ویکسین لگانے کے لیے پہنچا تو اس نے اپنے بازو پر سیلیکون لگایا ہوا تھا، تاہم وہ نرس کو چکمہ نہ دے سکے اور ان کو پولیس کے حوالے کر دیا گیا۔

اطالوی اخبار کے مطابق نرس فیلیپا بوا نے بتایا کہ جب انھوں نے اس شخص کی آستین اوپر کی تو ان کو محسوس ہوا کہ ان کے بازو کی جلد اصلی نہیں ہے۔

جعلی بازو پر ویکسین لگوانے کا واقعہ ایسے وقت میں سامنے آیا ہے جب ان لوگوں کے لیے قوانین کو سخت کیا گیا ہے جنھوں نے ابھی تک کرونا وائرس سے بچاؤ کی ویکسین نہیں لگوائی۔

واضح رہے کہ گزشتہ چوبیس گھنٹوں کے دوران اٹلی میں کرونا وائرس کے 17 ہزار نئے کیسز رپورٹ ہوئے ہیں، جب کہ 74 افراد ہلاک ہوئے۔ یورپ اور امریکا میں بھی کچھ افراد ویکسینیشن کے خلاف ہیں اور وہ ویکسین لگوانے سے کترا رہے ہیں۔ کرونا وائرس کی نئی پابندیوں کے خلاف یورپ میں مظاہرے بھی ہو رہے ہیں۔

Comments

یہ بھی پڑھیں