تازہ ترین

ٹرمپ کی بیٹی ایوانکا کو صدر عالمی بینک کے چناؤ کا ٹاسک دے دیا گیا

واشنگٹن: امریکی صدر ڈونلڈ ٹرمپ کی صاحب زادی ایوانکا ٹرمپ کو صدر عالمی بینک کے چناؤ کا ٹاسک دے دیا گیا۔

غیرملکی خبررساں ادارے کے مطابق امریکی صدر ٹرمپ کی بیٹی ایوانکا ٹرمپ کو صدر عالمی بینک منتخب کرنے کا ٹاسک دے دیا گیا، وائٹ ہاؤس کے مطابق سینئر مشیر ایوانکا ٹرمپ عالمی بینک کے نئے صدر کے چناؤ میں مدد کریں گی۔

وائٹ ہاؤس سے جاری اعلامیہ کے مطابق صدر ٹرمپ عالمی بینک کے نئے صدر کو نامزد کریں گے، نئے صدر کے چناؤ کے لیے ممبر ممالک ووٹنگ کریں گے۔

اعلامیہ کے مطابق ایوانکا ٹرمپ 2 سال سے عالمی بینک کی قیادت کے ساتھ کام کررہی تھیں، روایتی طور پر عالمی بینک کے صدر کا چناؤ امریکی صدر کو کرنا ہوتا ہے۔

واضح رہے کہ صدر عالمی بینک جم یانگ کم نے گزشتہ ہفتے مستعفی ہونے کا اعلان کیا تھا۔

مزید پڑھیں: ایوانکا ٹرمپ صدارتی مشیر بن گئیں

یاد رہے کہ ایوانکا ٹرمپ نے گزشتہ سال حکومتی کاموں کے لیے کابینہ حکام، وائٹ ہاؤس مشیروں اور معاونین کو اپنے ذاتی ای امیل اکاؤنٹ سے سیکڑوں ای میل بھیجی تھیں جس پر انہیں تنقید کا سامنا کرنا پڑا تھا۔

امریکی صدر ٹرمپ نے اپنی بیٹی کا دفاع کرتے ہوئے کہا تھا کہ سرکاری کاموں کے لیے ذاتی ای میل اکاؤنٹ استعمال کرنے کی خبریں جعلی ہیں جبکہ ڈیموکریٹس نے اس معاملے کی تحقیقات کا مطالبہ کیا تھا۔

اس سے قبل سابق وزیر خارجہ ہیلری کلنٹن پر بھی ذاتی ای میل اکاؤنٹ کے استعمال کا الزام لگایا گیا تھا اور ڈونلڈ ٹرمپ نے بطور صدارتی امیدوار اس معاملے کو اُٹھاتے ہوئے ہیلری کلنٹن کو بددیانت قرار دیا تھا۔

Comments

- Advertisement -