انگلینڈ کو بھارت کے خلاف ٹیسٹ سیریز کے دوران بڑا دھچکا لگ گیا۔
انگلش اسپنر جیک لیچ گھٹنے کی انجری کے باعث بھارت کے خلاف ٹیسٹ سیریز سے باہر ہو گئے۔ انگلینڈ کرکٹ بورڈ نے جیک لیچ کے انجرڈ ہونے کی تصدیق کر دی۔
انگلینڈ اور ویلز کرکٹ بورڈ (ای سی بی) نے اتوار کو کہا کہ اسپن سپیئر جیک لیچ بائیں گھٹنے کی انجری کی وجہ سے بھارت کے خلاف پانچ میچوں کی ٹیسٹ سیریز کے باقی میچوں سے باہر ہو گئے۔
حیدرآباد میں انگلینڈ کی پہلی ٹیسٹ فتح کے دوران فیلڈنگ کرتے ہوئے 32 سالہ لیچ کو گھٹنے میں دو بار چوٹ لگی تھی جس کے بعد وہ انجرڈ ہو کر دوسرے ٹیسٹ سے محروم ہو گئے تھے۔
ای سی بی نے کہا کہ وہ کسی متبادل کو طلب نہیں کرے گا اور لیچ ابوظہبی سے گھر روانہ ہوں گے جہاں ٹیم راجکوٹ میں جمعرات سے شروع ہونے والے تیسرے میچ سے پہلے ٹھہری ہوئی ہے۔
کرکٹ بورڈ نے ایک بیان میں مزید کہا کہ لیچ اپنی بحالی کے سلسلے میں انگلینڈ اور سمرسیٹ کی میڈیکل ٹیموں کے ساتھ مل کر کام کریں گے۔
انگلینڈ نے دوسرے ٹیسٹ میں لیچ کی جگہ شعیب بشیر کو اپنا ٹیسٹ ڈیبیو کروایا تھا۔
