قاسم آباد میونسپل کمیٹی کے انتخابات کالعدم قرار دیئے جائیں، جلال محمود شاہ -
The news is by your side.

Advertisement

قاسم آباد میونسپل کمیٹی کے انتخابات کالعدم قرار دیئے جائیں، جلال محمود شاہ

سندھ یونائیٹڈ پارٹی کے سربراہ اور قومی عوامی تحریک کے صدر سید جلال محمود شاہ نے مطالبہ کیا ہے کہ قاسم آباد میونسپل کمیٹی میں ہونے والے انتخابات کو کالعدم قرار دے کر دوبارہ الیکشن کرائے جائیں۔

یہ بات انہوں نے حیدرآباد کے علاقے قاسم آباد میں ایس یو پی کے مقتول رہنماء ڈاکٹر انور لغاری کی تعزیت کے بعد میڈیا سے گفتگو کرتے ہوئے کیا۔

سید جلال محمود شاہ کا کہنا تھا کہ ان کی جماعت کے انتخابی کیمپ پر ایسے وقت میں حملہ کیا گیا جب پولنگ شروع ہونے میں چند گھنٹے باقی رہ گئے تھے۔

انہوں نے کہاکہ حملے میں پارٹی کے رہنماء ڈاکٹر انور لغاری قتل جبکہ ایس یو پی کے امیدوار سمیت 2کارکنان شدید زخمی ہوگئے، یہ واقعہ پوری میونسپل کمیٹی میں ہونے والے انتخابات پر اثر انداز ہوا، واقعہ کے بعد لوگ خوف کا شکار ہوکر اپنے گھروں تک محدود ہوگئے اور الیکشن والے دن یہاں ٹرن آؤٹ بھی انتہائی کم رہا۔

انہوں نے سینئر رہنماء کے قتل پر سندھ بھر میں تین روزہ سوگ کا اعلان کرتے ہوئے قاتلوں کو فی الفور گرفتار کرنے کا مطالبہ کیا۔

دوسری جانب ایاز لطیف پلیجو نے مطالبہ کیا کہ قاسم آباد میونسپل کمیٹی میں ہونے والے انتخابات کو کالعدم قرار دے کر یہاں دوبارہ انتخابات کرائے جائیں اور اس واقعہ کی اعلیٰ سطحی تحقیقات کرائی جائے۔

Comments

comments

یہ بھی پڑھیں