میلبرن (13 دسمبر 2025): آسٹریلیا کی سب سے بڑی کرکٹ بگ بیش لیگ شروع ہونے میں کچھ روز باقی ہیں اور بڑی تعداد میں پاکستان کرکٹ ٹیم کے سپر اسٹارز کی شمولیت نے اس ایونٹ کو چار چاند لگا دیے ہیں۔
یہ پہلا موقع ہے کہ بابر اعظم، محمد رضوان، شاہین شاہ آفریدی اور حارث رؤف سمیت دیگر اہم کھلاڑی مختلف فرنچائز کی نمائندگی کریں گے۔ میلبرن رینیگیڈز نے پاکستان کرکٹ ٹیم کے وکٹ کیپر بیٹسمین محمد رضوان کا انتخاب کیا ہے، جس پر فرنچائز کے جنرل مینجر جیمز روزنگارٹن کافی خوش دکھائی دیتے ہیں۔
اے آر وائی نیوز کے نمائندے سے ویڈیو لنک پر گفتگو کرتے ہوئے ان کا کہنا تھا کہ پاکستانی سپر اسٹارز کی شمولیت نے بگ بیش لیگ کو اُفق پر پہنچا دیا ہے، آسٹریلیا اور بالخصوص میلبرن میں پاکستانی فینز کو بگ بیش لیگ کا بے صبری سے انتظار ہے۔ فین کلب تیار بیٹھا ہے کہ کب محمد رضوان میدان میں اتریں گے۔
جیمز روزنگارٹن کے مطابق محمد رضوان کے ساتھ ٹم سائیفرٹ کی جوڑی ان کی ٹیم کے لیے اہمیت رکھتی ہے جب کہ پاکستان سے ہی تعلق رکھنے والے نوجوان کرکٹر حسان خان بھی توجہ کا مرکز ہوں گے۔
میلبرن رینیگیڈز کے جنرل مینجر کا کہنا تھا کہ بابر اعظم سڈنی سکسرز کی جانب سے ان ایکشن ہوں گے تو وہی ہماری ٹیم بھی بھرپور تیاری سے میدان میں اترے گی۔ شاہین شاہ آفریدی اور حارث رؤف برق رفتار گیند بازی کریں گے تو یقیناً ہمارے بیٹرز مقابلے کے لیے پیچھے نہیں ہٹیں گے۔
ایک سوال پر جیمز روزنگارٹن کا کہنا تھا کہ اگر انھیں ڈرافٹنگ میں ایک اور پاکستانی کھلاڑی چننے کا موقع ملتا تو وہ ضرور صائم ایوب کا انتخاب کرتے کیوں کہ ان کی جادوئی اسپن بولنگ نے سب کو متاثر کر رکھا ہے۔
پاکستان کرکٹ بورڈ کے چیئرمین محسن نقوی کا شکریہ ادا کرتے ہوئے انھوں نے کہا کہ بڑی تعداد میں پاکستانی سپر اسٹارز کا این و سی جاری کرنا خوش آئند ہے، پاکستان اور آسٹریلیا کرکٹ کے روابطہ دن بہ دن مضبوط ہو رہے ہیں۔
علی حسن اے آروائی نیوز سے اسپورٹس رپورٹر کی حیثیت سے وابستہ ہیں اور کھیلوں کے معاملات میں گہری دلچسپی رکھتے ہیں