ممبئی : بالی ووڈ کی معروف اداکارہ جھانوی کپور نے اپنے لباس کے حوالے سے سوشل میڈیا کے کردار سے متعلق اہم انکشاف کیا ہے۔
ان کا کہنا ہے کہ سوشل میڈیا پر شیئر کی گئی تصاویر میں جو لباس زیب تن کرتی ہوں اس سے مجھے اپنے قرضوں کی ادائیگی میں کافی مدد ملتی ہے۔
اداکارہ جھانوی کپور نے بھارتی میڈیا کو دیئے گئے ایک انٹرویو میں سوشل میڈیا کو اپنے لیے قرضوں کی اقساط ادا کرنے میں مددگار قرار دے دیا۔
اپنے انٹرویو میں انہوں نے کہا کہ فلموں میں کام کرنا اور اس دوران ساڑھی، کرتا اور دیگر کپڑے پہننا میرا کام ہے لیکن سوشل میڈیا میرے لیے تفریح اور قسطوں کی ادائیگی میں آسانی پیدا کرتا ہے۔
انہوں نے کہا کہ سوشل میڈیا پر تصاویر شیئر کرنے اور مداحوں کے زیادہ سے زیادہ پسند کیے جانے کی وجہ سے زیادہ برینڈز مجھ سے رابطہ کرتے ہیں جس کے باعث مجھے قرضوں کی قسطیں ادا کرنے میں آسانی ہوتی ہے۔
خیال رہے کہ 4 نومبر کو جھانوی کپور کی فلم ’ملی‘ سنیما گھروں میں ریلیز کی گئی تھی، جو ہفتے کے اختتام تک 2 کروڑ روپے کا بزنس کرنے میں کامیاب رہی۔
