ٹوکیو : جاپان کی اسٹاک مارکیٹ تاریخ کی نئی بلند ترین سطح پرپہنچ گئی ، ٹوکیو الیکٹرون اورایڈوان ٹیسٹ کےشیئرزمیں نمایاں اضافہ ریکارڈ کیا گیا۔
تفصیلات کے مطابق مصنوعی ذہانت اور سیمی کنڈکٹر کے شعبے میں آنے والی حالیہ عالمی تیزی نے جاپانی شیئر بازار کو تاریخ کی نئی اور بے مثال بلندیوں پر پہنچا دیا ہے۔
الجزیرہ ٹی وی کی رپورٹ میں بتایا گیا جاپان کا معروف "نکئی انڈیکس” اپنی تاریخ میں پہلی بار 68 ہزار پوائنٹس کی نفسیاتی سطح عبور کر گیا ہے، جس نے عالمی سرمایہ کاروں کی توجہ ٹوکیو اسٹاک مارکیٹ کی جانب مبذول کرا دی ہے۔
مارکیٹ تجزیہ کاروں کا کہنا ہے کہ اس تاریخی ریلی کی قیادت مصنوعی ذہانت اور چپ بنانے والی ٹیکنالوجی کمپنیاں کر رہی ہیں، جس کی وجہ سے جاپانی ٹیکنالوجی سیکٹر پر عالمی اور غیر ملکی سرمایہ کاروں کا اعتماد تیزی سے بحال ہوا ہے۔
اس کاروباری تیزی کے دوران جاپانی کارپوریٹ سیکٹر میں ایک بہت بڑا الٹ پھیر دیکھنے کو ملا، جاپان کے مشہور سرمایہ کاری گروپ ‘سافٹ بینک’ نے اپنی اسمارٹ اے آئی سرمایہ کاری کے باعث دو دہائیوں (20 سال) بعد آٹو موبائل کمپنی ‘ٹویوٹا’ کو مارکیٹ ویلیو میں پیچھے چھوڑ دیا ہے۔ سافٹ بینک اب جاپان کی سب سے قیمتی کمپنی بن گئی ہے۔
سافٹ بینک کو یہ تاریخی فائدہ چیٹ جی پی ٹی بنانے والی کمپنی ‘اوپن اے آئی’ اور چپ ڈیزائنر کمپنی ‘آرم’ میں وقت پر کی جانے والی بھاری سرمایہ کاری کی وجہ سے حاصل ہوا ہے۔
مارکیٹ ریلی کے دوران ‘ٹوکیو الیکٹرون’ اور ‘ایڈوان ٹیسٹ’ جیسی بڑی سیمی کنڈکٹر کمپنیوں کے شیئرز کی قیمتوں میں زبردست اضافہ ریکارڈ کیا گیا ہے۔
الجزیرہ کی رپورٹ کے مطابق، جاپانی شیئر بازار پر اس وقت مکمل طور پر اے آئی سے منسلک کمپنیوں کا غلبہ برقرار ہے اور غیر ملکی فنڈز کی آمد کا سلسلہ مسلسل جاری ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں