جدہ: جدہ میونسپلٹی نے عدالتی حکم پر عمل کرتے ہوئے السلامہ محلے میں پارک کے لیے مختص پلاٹ پر تعمیر کردہ مقامی شہری کی عمارت منہدم کردی ہے۔
اخبار 24 کے مطابق جدہ میونسپلٹی نے نومبر دو ہزار بیس کے دوران اپنی رپورٹ میں واضح کیا تھا کہ ایک شہری نے چودہ سو مربع میٹر کا پلاٹ جو کہ پارک کے لیے مختص تھا، اس پر ناجائز قبضہ کر رکھا ہے۔
مقامی شہری کا دعویٰ تھا کہ جس پلاٹ پر اس نے اپنا مکان تعمیر کیا ہے وہ اس کی ملکیت ہے اور تمام دستاویزات بھی موجود ہیں، میونسپلٹی نے مقامی شہری کے خلاف عدالت سے رجوع کیا۔
عدالت نے پلاٹ سے متعلق مقامی شہری کی رجسٹری کے دعوے کو مسترد کردیا تھا تاہم مقامی شہری نے اپیل کورٹ سے رجوع کیا، جس نے پرائمری کورٹ کے فیصلے کی توثیق کرتے ہوئے مدعا علیہ کو پلاٹ خالی کرنے اور میونسپلٹی کے حوالے کرنے کا حکم جاری کردیا، آخر میں بجلی اور نیشنل واٹر کمپنی سے خط و کتابت کرکے پلاٹ پر تعمیر مکان کی تمام سہولتیں ختم کرائی گئیں۔
جدہ میونسپلٹی کا کہنا ہے کہ وہ سرکاری املاک پر تجاوزات ختم کرنے کا مشن جاری رکھے گی، اس حوالے سے ایوان شاہی سے جاری کردہ فرامین اور سرکاری املاک سے ناجائز فائدہ اٹھانے کا سلسلہ ختم کرانے والے قوانین و ضوابط کے نفاذ کے لیے کوشاں رہے گی۔
