The news is by your side.

وزیراعظم نے فیصلہ کیا جنوبی پنجاب کا سب سیکرٹریٹ ملتان میں ہوگا،جہانگیرترین

لاہور : پاکستان تحریک انصاف کے سابق سیکرٹری جنرل جہانگیرترین کا کہنا ہے کہ وزیراعظم نے فیصلہ کیا جنوبی پنجاب کا سب سیکرٹریٹ ملتان میں ہوگا، فیصلے کی مکمل حمایت کرتا ہوں، اب جنوبی پنجاب کے شہریوں کو اپنے کام کے لیے لاہور نہیں جانا پڑے گا۔

تفصیلات کے مطابق پاکستان تحریک انصاف کے سابق سیکرٹری جنرل جہانگیرترین نے اپنے بیان میں کہا کہ وزیراعظم نے فیصلہ کیا جنوبی پنجاب کا سب سیکرٹریٹ ملتان میں ہوگا، بہاولپور کو سب سیکرٹریٹ قائم کرنے کی حمایت کی خبریں بے بنیاد ہیں۔

جہانگیرترین کا کہنا تھا کہ وزیراعظم کے فیصلے کی مکمل حمایت کرتا ہوں، ملتان جنوبی پنجاب کا سب سے بڑا اور مرکزی شہر ہے، جنوبی پنجاب کے لوگوں کی ملتان تک رسائی بہاولپور کی نسبت آسان ہے۔

انھوں نے کہا کہ جنوبی پنجاب صوبے کے قیام اور صوبے کی حمایت کا اعلان کیا تھا، پریس کانفرنس میں واضح کیا تھا حکومت جنوبی پنجاب صوبے پر کام کررہی ہے۔

پی ٹی آئی کے سابق سیکرٹری جنرل کا کہنا تھا جنوبی پنجاب صوبہ کے قیام سے پہلے ہی سول سیکریٹریٹ کام شروع کرے گا، سول سیکرٹریٹ میں چیف سیکرٹری، ایڈیشنل آئی جی لیول کےافسران بیٹھیں گے، جنوبی پنجاب کے شہریوں کو اپنے کام کے لیے لاہور نہیں جانا پڑے گا۔

یاد رہے اگست میں ہونے والے وفاقی کابینہ اجلاس میں جنوبی پنجاب صوبے کے قیام کے لیے بھی کمیٹی بنائی گئی تھی ، جس میں وزیرِ خارجہ شاہ محمود قریشی اور خسرو بختیار شامل تھے۔

خیال رہے تحریک انصاف نے حکومت کے ابتدائی 100 روز کے ایجنڈے کا اعلان کیا تھا، جس کو جنوبی پنجاب صوبہ محاذ تحریک کے سربراہ نے انقلابی اقدام قرار دیتے ہوئے کہا تھا کہ عمران خان ملک و قوم کی تقدیر بدلنے کا ایجنڈا لے کر آئے۔

Comments

یہ بھی پڑھیں