بیجنگ: برطانیہ کے فارن سیکریٹری جریمی ہنٹ کی زبان پھسل گئی، اپنی چینی اہلیہ کو جاپانی کہہ دیا، میٹنگ میں قہقہے لگ گئے۔
غیرملکی خبررساں ادارے کے مطابق برطانیہ کے فارن سیکریٹری جریمی ہنٹ چین کے پہلے دورے پر پہنچے، جریمی ہنٹ چین کے فارن منسٹر وینگ یی کے ساتھ میٹنگ شروع ہونے سے پہلے ان کو متاثر کرنے کے لیے چین سے اپنا تعلق بتانا چاہتے تھے لیکن زبان پھسل گئی اور اپنی چینی بیوی کو جاپانی کہہ گئے۔
چینی بیوی کو جاپانی کہنے پر میٹنگ میں قہقہے بلند ہوگئے، جریمی ہنٹ نے فوراً معذرت کرتے ہوئے جملہ درست کیا اور کہا کہ میری بیوی چینی ہے، چینیوں نے برا منانے کے بجائے ہنٹ کی غلطی کو قہقہہ میں اُڑادیا۔
She is all of us #JeremyHunt pic.twitter.com/AYdhXl9GLs
— The Agitator #JC9 (@UKDemockery) July 30, 2018
جیریمی ہنٹ نے جملہ درست کرنے کے بعد کہا کہ میری بیوی چائنیز ہے اور میرے بچے آدھے چائنیز ہیں، ان کے نانا، نانی بھی چائنیز ہیں اور ہمارے چائنا کے ساتھ مضبوط تعلقات ہیں۔
واضح رہے کہ برطانیہ کے فارن سیکریٹری جیریمی ہنٹ کی شادی لوشیا سے 2009 میں انجام پائی تھی، ان کا ایک بیٹا اور دو بیٹیاں ہیں۔
برطانیہ کے فارن سیکریٹری اور چین کے فارمن منسٹر وینگ یی کے درمیان پوسٹ بریگزٹ فری ٹریڈ ڈیل کے حوالے سے گفتگو ہوئی۔
خیال رہے کہ بورس جانسن بریگزٹ معاملے پر اختلافات کے باعث وزارت سے مستعفی ہوئے تھے جس کے بعد جیریمی ہنٹ کو برطانیہ کا نیا وزیر خارجہ بنادیا گیا تھا۔