پاکستان تحریک انصاف اور جماعت اسلامی نے اسلام آباد ہائی کورٹ کے حکم کے باوجود کل بروز 31 دسمبر کو دارالحکومت میں بلدیاتی انتخابات کا انعقاد نہ کرنے کی صورت میں الیکشن کمیشن کے خلاف توہین عدالت کی درخواستیں دائر کرنے کا فیصلہ کرلیا۔
ذرائع کے مطابق پی ٹی آئی کل صبح اسلام آباد ہائی کورٹ میں الیکشن کمیشن اور وفاقی حکومت کے خلاف توہین عدالت درخواست دائر کرے گی۔ یہ فیصلہ پی ٹی آئی اسلام آباد کی قیادت کے اہم مشاورتی اجلاس میں کیا گیا۔
پی ٹی آئی کا کہنا ہے کہ چیف الیکشن کمشنر سکندر سلطان راجہ عدالتی احکامات کی تعمیل نہ کر کے توہین عدالت کے مرتکب ہوں گے۔
دوسری جانب ذرائع نے بتایا کہ جماعت اسلامی نے الیکشن کمیشن کے خلاف توہین عدالت کی درخواست تیار کرلی جو ممکنہ طور پر کل دائر کی جائے گی۔
جماعت اسلامی کا کہنا ہے کہ کل پولنگ نہ ہونے کی صورت میں عدالت سے رجوع کریں گے، عدالتی حکم پر عمل درآمد کرانا الیکشن کمیشن کی ذمہ داری ہے۔
