کابل: پاکستان نے افغانستان کی تعمیر نو کا ایک اوروعدہ پورے کرتے ہوئے کابل میں جناح اسپتال تعمیر کردیا، اسپتال کا افتتاح آج کیا گیا۔
تفصیلات کے مطابق افغانستان میں انفرا اسٹرکچر کی بحالی میں پاکستان پیش پیش ہے اور اسی مقصد کے تحت کابل کے علاے دشت برجی میں ’جناح اسپتال‘ کے نام سے ایک بین الاقوامی معیار کا اسپتال تعمیر کیا گیا ہے۔
اسپتال دوسو بستروں پر مشتمل ہے اور اس کی تعمیر میں 25 ملین ڈالر لاگت آئی ہے۔ اسپتال میں جدید طرز کے علاج کی تمام تر سہولیات میسر ہوں گی اور ہر قسم کی بیماریوں میں مبتلا مریضوں کا علاج کیا جاسکے گا۔
اسپتال کا افتتاح افغان نائب صدر محمد سرور دانش، افغان وزیر برائے صحت کے مشیر ڈاکٹر فیروز الدین اور پاکستان کے وزیر برائے پارلیمانی امورعلی محمد خان نے مشترکہ طور پر کیا۔ یاد رہے کہ پاکستان کی جانب سے افغانستان میں انفرا اسٹرکچر کی بحالی کے لیے ایک بلین امریکی ڈالر سے زائد کے پراجیکٹ زیر تعمیر ہیں ۔
اس موقع پرتقریب سے خطاب کرتے ہوئے وزیرپارلیمانی امورعلی محمد خان نے کہاکہ امید ہے ہسپتال کے قیام سے افغانستان میں صحت کے شعبے میں بہتری آئےگی۔ انہوں نے کہاکہ پاکستان ایسے منصوبے جاری رکھے گا۔
افغان حکومت نے پاکستانی حکومت اور عوام کی جانب سے شکریہ ادا کرتے ہوئے کہا کہ یہ ہسپتال پاکستان کی جانب سے افغان عوام کےلئے تحفہ ہے۔
تقریب سے خطاب کرتے ہوئے افغانستان میں پاکستانی سفیرزاہد نصر اللہ نے کہاکہ پاکستان کی جانب سے افغانستان میں لگائے گئے منصوبوں میں سب سے بڑا منصوبہ جناح ہسپتال کا ہے
پاکستانی حکام کا کہنا ہے کہ افغانستان میں پاکستان کے بیشتر پراجیکٹ یا تو مکمل ہوچکے ہیں یا بہت جلد پایہ تکمیل تک پہنچنے والے ہیں، اور جلد ہی ان کا افتتاح کیا جائے گا۔
یاد رہے کہ پاکستان افغانستان میں قیامِ امن کے لیے اہم کردار ادا کررہا ہے ، امریکا اور افغان طالبان کے قطر میں ہونے والے مذاکرات میں پاکستان کلیدی کردار کا حامل ہے۔
