The news is by your side.

Advertisement

آنکھوں‌ اور دماغ کے قریب سے گزرنے والی تیز دھار چھری کیسے نکالی گئی؟

کراچی: شہر قائد کے بڑے سرکاری اسپتال جناح میں ایک انتہائی حساس آپریشن کے ذریعے ایک نوجوان کی آنکھ اور دماغ کے قریب سے چہرے کے اندر گھسنے والی چھری کو کامیابی سے نکال لیا گیا۔

تفصیلات کے مطابق کراچی میں ایک جھگڑے کے دوران 32 سالہ نوجوان کی بائیں کن پٹی پر آنکھ کے بالکل قریب بھنوئیں میں چھری چہرے کے اندر تک گھس گئی، جسے فوری طور شہید بے نظیر انسٹی ٹیوٹ آف ٹراما سینٹر لایا گیا، تاہم کیس کی حساس نوعیت کو دیکھ کر زخمی شخص کو جناح اسپتال منتقل کر دیا گیا۔

جناح اسپتال کے سرجنوں نے یہ حساس آپریشن کر کے بڑا کارنامہ انجام دیا، تیز دھار چھری کا لمبا پَل آنکھوں‌ اور دماغ کے قریب سے گزر کر اندر جبڑے تک اتر گیا تھا۔

جناح اسپتال کے ترجمان ڈاکٹر اجمل خان یوسفزئی نے بتایا کہ یہ آپریشن ساڑھے چار گھنٹے جاری رہا، اور آپریشن میں 3 ڈاکٹروں اور 3 نرسوں نے حصہ لیا۔

ترجمان کے مطابق 32 سالہ مریض کا کامیاب آپریشن کر کے انھیں اب آنکھوں کے وارڈ میں منتقل کر دیا گیا ہے، جہاں ان کی حالت خطرے سے باہر ہے۔

انتظامیہ کے مطابق نجی اسپتالوں میں اس طرح کے آپریشن پر لاکھوں روپے کے اخراجات آتے ہیں، جسے جناح اسپتال میں مفت انجام دیا گیا ہے۔

Comments

یہ بھی پڑھیں