سکھر: صوبہ سندھ کے شہر سکھر کی تحصیل پنوں عاقل میں جرگے کے حکم پر چھ سال کی بچی کو ونی کردیا گیا۔
تفصیلات کے مطابق صوبہ سندھ کے شہر سکھر کی تحصیل پنوں عاقل میں جرگے کے حکم پر چھ سال کی بچی کا سات سال کے بچے جواد سے نکاح کردیا گیا۔
جرگے کے حکم پر سات سال کے جواد کے نکاح کی خبر آے آر وائی نیوز نے نشر کی تو ایس ایس پی نے نوٹس لیتے ہوئے جرگے کے خلاف مقدمہ درج کرنے کا حکم دے دیا۔
گزشتہ روز بچوں کے والدین کی جانب سے احتجاج کرنے پر جرگے نے بچوں کے والدین کے خلاف پرچہ کٹوادیا تھا۔
مزید پڑھیں: بیٹیوں کے رشتے دو یا 123 ایکڑ زمین، جرگے کا ظالمانہ فیصلہ
واضح رہے کہ رواں سال نومبر میں پنجاب کے شہر روجھان میں جرگے نے ظالمانہ فیصلہ دیا تھا جس میں کہا گیا تھا کہ بیٹیوں کے رشتے دے دو یا 123 ایکڑ زمین دے دو۔
متاثرہ لڑکی ریما نے اپنے ویڈیو پیغام میں کہا تھا کہ ان پڑھ جاہل وڈیروں سے شادی نہیں کرنا چاہتی، شادی کے لیے دباؤ ڈالا جارہا ہے، پولیس بھی تعاون نہیں کررہی خدارا ہماری مدد کی جائے۔
میڈیا پر خبر چلنے کے بعد آئی جی پنجاب نے معاملے کا نوٹس لے کر انکوائری حکم دیا تو پولیس حرکت میں آئی اور پنچایتی فیصلے کا ڈراپ سین ہوگیا پولیس نے دونوں فریقین میں صلح کرادی تھی۔
