لاہور: ہائیکورٹ نے سابق وزیر اعظم عمران خان سمیت دیگر رہنماؤں کے خلاف مقدمات کے لیے قائم جے آئی ٹی کی تفتیش کو عدالتی فیصلے سے مشروط کر دیا۔
تفصیلات کے مطابق لاہور ہائیکورٹ کے جسٹس طارق سلیم شیخ کی سربراہی میں تین رکنی بنچ نے تحریک انصاف کے رہنما فواد چودھری اور مسرت جمشید چیمہ کی درخواستوں پر سماعت کی، جن میں جے آئی ٹی کو کام سے روکنے کی درخواست کی استدعا کی گئی تھی۔
فل بنچ نے قرار دیا کہ وہ جے آئی ٹی کو تفتیش سے نہیں روک رہے، جے آٸی ٹی تفتیش جاری رکھے گی، لیکن اس کی تفتیش عدالتی فیصلے سے مشروط ہوگی۔
تحریک انصاف کے وکلا نے مؤقف اختیار کیا تھا کہ نگراں حکومت کو جے آئی ٹی کی تشکیل کا حق نہیں ہے، مقدمات بدنیتی کی بنیاد پر قائم کیے گئے اور انسداد دہشت گردی ایکٹ کی دفعات شامل کی گئیں، جو ان مقدمات میں شامل نہیں کی جا سکتیں۔
ایڈووکیٹ جنرل پنجاب شان گل نے درخواست کی مخالفت کی، ایڈووکیٹ جنرل کے مطابق کابینہ نے جے آئی ٹی کی تشکیل کے لیے اختیارات تفویض کیے تھے، ابھی تفتیش ہونی ہے لیکن پہلے لاہور ہائیکورٹ سے رجوع کر لیا گیا، لہٰذا عدالت درخواست مسترد کر دے۔
