واشنگٹن : سابق امریکی نائب صدر جوبائیڈن جلسے کے دوران اپنی بہن اور اہلیہ کا تعارف کراتے ہوئے غلطی کر بیٹھے اور اہلیہ کو بہن کہہ دیا۔
تفصیلات کے مطابق امریکا میں ان دنوں صدارتی انتخابات کا میدان سج رہا ہے جس کےلیے ڈیموکریٹس اور ریپبلکنز صدارتی امیدواروں کی انتخابی مہم تیزی سے جاری ہے اور امیدوار شہر شہر جاکر جلسے کررہے ہیں۔
ڈیموکریٹ کی جانب سے ممکنہ صدارتی امیدوار سابق نائب صدر جوبائیڈن بھی جلسوں اور مباحثوں میں مصروف ہیں اور ڈیموکریٹس کی جانب سے ان کا پلڑا بھی کافی بھاری ہے لیکن گزشتہ روز سپر ٹیوز ڈے کی تقریر کے دوران جوبائیڈن کی غلطی سوشل میڈیا پر اس وقت مذاق بن گئے جب انہوں نے بیوی کا تعارف بہن اور بہن کا تعارف بطور اہلیہ کروایا۔
سوشل میڈیا پر وائرل ہونے والی ویڈیو میں امریکی صدارتی امیدوار جوبائیڈن کو دیکھا اور سنا جا سکتا ہے کہ یہ اپنی اہلیہ کا ہاتھ تھامتے ہوئے مجمع سے مخاطب ہو کر کہہ رہے ہیں کہ ‘یہ میری چھوٹی بہن ویلری ہیں” جبکہ ان کی اہلیہ نہیں نہیں کہتی رہیں’۔
WATCH: Joe Biden confuses his wife with his sister. pic.twitter.com/HOPlV3Fkb4
— Trump War Room – Text EMPOWER to 88022 (@TrumpWarRoom) March 4, 2020
جوبائیڈن اپنی بہن کی جانب مڑے اور ان کا ہاتھ تھام کر تعارف کرانے لگے تو اپنی غلطی کا احساس ہوا اور فوراً کہا کہ دونوں خواتین نے اپنی جگہیں تبدیل کرلیں اس لیے مجھے مغالطہ ہوگیا۔
اس کے بعد سابق نائب صدر جو بائیڈن نے اپنی غلطی کو درست کرتے ہوئے دوبارہ تعارف کرایا کہ ‘یہ میری اہلیہ ہیں اور یہ ہیں میری بہن ہیں’۔
تاہم اس دوران جلسہ گاہ قہقہوں سے گونج اُٹھا اور شرکاء ہنس ہنس کے لوٹ پوٹ ہوگئے۔
خیال رہے کہ نیویارک کے میئر اور امریکی ارب پتی مائیکل بلومبرگ بھی جوبائیڈن کے حق میں دستبردار ہوچکے ہیں، امیدوار جوبائیڈن کا کہنا ہے کہ صدارتی نامزدگی کیلئے بلوم برگ کی حمایت اورمالی تعاون کا خیرمقدم کرتے ہیں۔