The news is by your side.

Advertisement

یوکرین کیلئے امریکہ کی فوجی امداد، بائیڈن کے احکامات جاری

واشنگٹن : امریکہ نے یوکرین کو فوجی کمک جلد از جلد مہیا کرنے کے لیے دوسری جنگ عظیم کے زمانے کے جنگی و غیرجنگی ساز و سامان کی امداد اور اسے استعمال کے لیے مستعار دینے کے ’’لینڈ لیز‘‘ پروگرام کو بحال کر دیا ہے۔

امریکی صدر جو بائیڈن نے پیر کے دن ایک مسودہ قانون پر دستخط کرتے ہوئے اسے نافذالعمل کر دیا جس کے تحت ستمبر 2023 کے اختتام تک یوکرین اور مشرقی یورپ کے دیگر ممالک کو فوجی ساز و سامان مستعار دینے کے عمل میں تیزی لائی جائے گی۔

یہ اقدام دوسری جنگ عظیم کے زمانے میں نازی جرمنی کے خلاف برسر پیکار برطانیہ اور دیگر امریکی اتحادیوں کی مدد کے لیے بنائے جانے والے قانون کی تازہ ترین شکل ہے۔ کہا جاتا ہے کہ مذکورہ قانون نے دوسری جنگ عظیم میں اتحادیوں کی فتح میں اہم کردار ادا کیا تھا۔

جوبائیڈن نے روسی یلغار کو ’’پیوٹن کی ظالمانہ جنگ‘‘ قرار دیتے ہوئے کہا کہ انہوں نے ایک بل پر دستخط کیے ہیں جس سے یوکرین کی حکومت اور اس کے عوام کو روس کے خلاف اپنی سرزمین اور اپنی جمہوریت کے دفاع میں مدد کی امریکی کوششوں میں ایک اور اہم ذریعہ میسر آئے گا۔

انہوں نے علمی رہنماؤں پر زور دیتے ہوئے کہا کہ اس وقت یوکرین کے لیے یہ امداد کلیدی اہمیت کی حامل ہے۔

Comments

یہ بھی پڑھیں