The news is by your side.

Advertisement

گوجرانوالہ، گجرات، سیالکوٹ، وزیر آباد میں مشترکہ ایکسپو سینٹر بنانے کا فیصلہ

گجرات: حکومت نے گوجرانوالہ، گجرات، سیالکوٹ اور وزیر آباد میں مشترکہ ایکسپو سینٹر بنانے کا فیصلہ کر لیا۔

تفصیلات کے مطابق مشیر تجارت رزاق داؤد نے آج گجرات چیمبر آف کامرس اینڈ انڈسٹری کا دورہ کیا، انھوں نے اس موقع پر گفتگو میں کہا کہ گوجرانوالہ، گجرات، سیالکوٹ، وزیر آباد میں مشترکہ ایکسپو سینٹر بنانے کا فیصلہ کیا گیا ہے۔

رزاق داؤد کا کہنا تھا کہ ایکسپو سینٹر کی اراضی کے لیے پنجاب حکومت سے رجوع کیا جائے گا۔

مشیر تجارت نے ملکی برآمدات میں پنجاب کے مذکورہ شہروں کے کردار کو سراہا، اور تاجروں کو ہر ممکن تعاون کی یقین دہانی کرائی، انھوں نے کہا کوالٹی بہتری سے افریقہ اور مشرق وسطیٰ کی مارکیٹوں تک رسائی حاصل ہوگی۔

مشیر تجارت نے الیکٹرک فین مینوفیکچررز ایسوسی ایشن کا بھی دورہ کیا، جہاں انھوں نے ملکی برآمدات میں اضافے کے لیے تاجروں کے اقدامات کو سراہا، انھوں نے اس موقع پر کہا کہ وفاق اور صوبوں کے تعاون سے کرونا وبا پر قابو پایا گیا، بروقت اقدامات اور ایس او پیز پر عمل سے تجارت میں بہتری آئی۔

رزاق داؤد کا کہنا تھا کہ حکومت نے مختلف خام مال پر ٹیکسوں اور ڈیوٹیز میں کمی کر دی ہے، اس سلسلے میں 41 فی صد خام مال کی ٹیرف ریشنلائزیشن کی گئی ہے۔

Comments

یہ بھی پڑھیں