ڈھاکہ : اردن کی ملکہ رانیہ نے روہنگیا مسلمانوں کی صورتحال کوہولناک قرار دیدیا۔
تفصیلات کے مطابق اردن کے فرمانروا شاہ عبداللہ دوم کی اہلیہ ملکہ رانیہ نے بنگلہ دیش میں روہنگیا پناہ گزین کیمپوں کا دورہ کیا، جہاں برمی فوج کے مظالم سے متاثرہ افراد اور بچوں سے ملاقات کی اور ان پر ڈھائے جانے والے مظالم کی داستان سنی۔
ملکہ رانیہ نے روہنگیا مسلمانوں کی صورتحال کو ہولناک قرار دیا اور کہا کہ عالمی برادری روہنگیا مسلمانوں کی مدد کیلئے اقدامات کرے۔
اردن کی جانب سے بیان میں کہا گیا ہے کہ اردن روہنگیا متاثرین کے حقوق کے تحفظ کے لیے اقوام متحدہ اور عالمی برادری کے ساتھ مل کر کام جاری رکھے گا۔
دوسری جانب پناہ گزین کیمپوں میں کام کرنے والی امدادی تنظیموں نے اقوام متحدہ سے روہنگیا پناہ گزینوں کی امداد کے لئے مزید امداد کی اپیل کی ہے۔
خیال رہے کہ رواں سال اگست میں برما کے مسلم اکثریتی صوبے رخائن میں برمی افواج نے نہتے شہریوں کے خلاف آپریشن شروع کیا تھا ‘ جس میں ہزاروں افراد ہلاک جبکہ سینکڑوں دیہات نذرِ آتش کردیے گئے تھے۔
مزید پڑھیں : بنگلہ دیش کے کیمپوں میں مقیم روہنگیا بچے غذائی قلت کا شکار
برمی فوج اوربدھ مت سے تعلق رکھنے والے انتہا پسندوں سے اپنی جان بچا کربنگلہ دیش پہنچنے والے روہنگیا مسلمانوں کی تعداد چھ لاکھ سے زیادہ ہو گئی ہے، ۔بچے،بوڑھے جوان اورخواتین کیمپوں میں کسمپرسی کی زندگی گزارنے پرمجبور ہیں۔
قوام متحدہ کی جانب سے جاری کردہ اعدادوشمار کے مطابق تین لاکھ چالیس ہزارروہنگیا بچے اس وقت کیمپوں میں بدترین زندگی گزاررہے ہیں۔نہ ہی انہیں مناسب خوراک میسر ہے،نہ تعلیم اورنہ ہی دیگرسہولتیں انہیں دی جارہی ہیں‘ ادارے کی جانب سے استدعا کی گئی ہے کہ اس بدترین انسانی المیے سے نمٹنے کے لیے عالمی برادری مدد کرے۔
