نوشہروفیروز: سندھ میں مبینہ طور پر قتل کیے جانے والے صحافی عزیزمیمن کی پوسٹ مارٹم رپورٹ جاری کردی گئی۔
اے آر وائی نیوز کے مطابق صحافی عزیز میمن کی پوسٹ مارٹم رپورٹ لیبارٹریز اینڈ کیمیکل ایزیمائنر کراچی سے جاری کردی گئی ہے۔
ڈاکٹر شاہد مصطفیٰ کے مطابق عزیز میمن کے جسم کے 15 سیمپل موصول ہوئے، سیمپلز میں مرحوم کے کپڑے اور بوٹ بھی شامل تھے۔
انہوں نے کہا کہ تمام سیمپل کے مشاہدہ کے بعد رپورٹ نگیٹو جاری کی ہے، ایم ایس محراب پور اسپتال کا کہنا تھا کہ دل کی رپورٹ آنا باقی ہے۔
ایس ایم تعلقہ اسپتال کا کہنا ہے کہ رپورٹ موصول ہونے پر فائنل رپورٹ جاری کریں گے۔
دوسری جانب سینئر سپرنٹنڈنٹ آف پولیس جامشورو ولی اللہ نے قومی اسمبلی کی قائمہ کمیٹی برائے داخلہ کو بریفنگ دیتے ہوئے بتایا کہ میڈیکل رپورٹ میں صحافی کے قتل کا کوئی ثبوت نہیں ملا ہے۔
مزید پڑھیں: صحافی عزیز میمن کا قتل، بلاول بھٹو کی جے آئی ٹی بنانے کی پیشکش
ایس ایس پی کا کہنا تھا کہ نجی ٹی وی کے رپورٹر عزیز میمن کی موت طبعی ہے، تفتیش کے لیے کیمرا مین حراست میں ہے۔
ایس ایس پی ولی اللہ کے مطابق صحافیوں کے دباؤ پر قتل کی ایف آئی آر درج کی گئی تھی جس پر چیئرمین قائمہ کمیٹی نے عزیز میمن کے مبینہ قتل کی تمام رپورٹس کمیٹی کو فراہم کرنے کی ہدایت کردی۔
یاد رہے کہ گزشتہ ماہ ضلع نوشہروفیروز کے شہر محراب پور میں سندھی چینل کے رپورٹر عزیز میمن کی لاش نہر سے برآمد ہوئی تھی جس کے بعد قتل کے شبے میں ان کے ساتھی کیمرا مین سمیت 2 افراد کو حراست میں لیا گیا تھا۔
