The news is by your side.

Advertisement

‘ مولانا فضل الرحمان حکومت سے کوئی معاہدہ نہیں کریں گے’

اسلام آباد : جے یو آئی کے رہنما ایڈووکیٹ کامران مرتضی نے کہا ہے کہ مولانا فضل الرحمان حکومت سے کوئی معاہدہ نہیں کریں گے بلکہ حکومت پر مزید دباو بڑھائیں گے ، تحریک کے پلان بی کا آغاز آج سے ہوگا۔

تفصیلات کے مطابق جے یو آئی کے رہنما ایڈووکیٹ کامران مرتضی نے ہائی کورٹ میں آر وائی نیوز سے غیر رسمی گفتگو کرتے ہوئے کہا مولانا فضل الرحمان کی تحریک کے پلان بھی کا آغاز آج سے ہو گا، پلان بی میں تمام اپوزیشن جماعتیں جے یو آئی کا ساتھ دیں گی۔

کامران مرتضی کا کہنا تھا کہ اپوزیشن نے حکومت کے خلاف شدت لانے کا فیصلہ کر لیا ہے، مولانا فضل الرحمان حکومت سے کوئی معاہدہ نہیں کریں گے بلکہ حکومت پر مزید دباو بڑھائیں گے اور اسلام آباد دھرنا بھی اپنی جگہ پر قائم دائم رہے گا۔

یاد رہے گذشتہ روز جمعیت علماء اسلام (ف) کے سربراہ مولانا فضل الرحمان نے ’پلان بی‘ کا اعلان کرتے ہوئے کہا تھا کہ کل شام کو لائحہ عمل بتاؤں گا ہمیں ایک جگہ سے دوسری جگہ جانا ہے، یہ مارچ ’پلان اے‘ ہے جو برقرار رہے گا۔

مزید پڑھیں : مولانا فضل الرحمان نے ’پلان بی‘ کا اعلان کردیا

ان کا کہنا تھا کہ پلان بی پر کل سے عملدرآمد شروع ہوگا، پلان بی کی طرف جائیں گے تو میں شانہ بشانہ ہوں گا، قانون کو ہاتھ میں نہیں لینا جدوجہد کو پرامن رکھنا ہے، گھر نہیں جانا ہے، پلان بی کے لیے کارکنان گھروں سے نکل آئیں۔

مولانا فضل الرحمان نے کہا تھا کہ کارکنوں کے حوصلے، عزم اور جرأت نے سرفخر سے بلند کردیا، حالات سے واقف ہیں بہت سے گوشوں سے رابطے ہوتے ہیں، اعتماد کے ساتھ بتانا چاہتا ہوں آپ مقصد کے حصول کے قریب ہیں، ہمارا بیانیہ غالب آچکا ہے اور ان کا بیانیہ مسترد ہوچکا ہے۔

Comments

comments

یہ بھی پڑھیں