بتا!تیری رضا کیا ہے، جنون کی 13 سال بعد واپسی -
The news is by your side.

Advertisement

بتا!تیری رضا کیا ہے، جنون کی 13 سال بعد واپسی

جنون بینڈ نے ایک بار پھراپنا مشہورِ زمانہ گیت ’بتا! تیری رضا کیا ہے، ریلیز کردیا ہے، گانے کی ویڈیو میں سلمان احمد، علی عظمت اور برائن او کونل13 سال کے وقفے کے بعد اکھٹے دکھائی دیے۔

تفصیلات کے مطابق جشنِ آزادی کے موقع پر جنون بینڈ نے اپنے مداحوں کو یومِ آزادی کا تحفہ دیتے ہوئے اپنے گیت ’بتا! تیری رضا کیا ہے‘ کی نئی ویڈیو سوشل میڈیا پر لانچ کردی ہے۔

جنون جنون نامی یہ بینڈ ماضی میں کروڑوں دلوں کی دھڑکن رہا ہے اور اپنے مخصوص صوفی راک اسٹائل کے سبب برصغیر پاک و ہند میں یکساں مقبول رہا، ماضی کے نوجوان اس بینڈ کے دیوانے تھے اور اس کے سنگر علی عظمت، گٹارسٹ سلمان احمد اور امریکی نژاد برائن او کونل ان نوجوانوں کے ہیرو تھے۔

جنون

آج سے لگ بھگ 25 سال قبل جنون – دی بینڈ کے قیام عمل میں آیا تھا اور اپنے مخصوص صوفی راک اسٹائل کے سبب یہ بینڈ دیکھتے ہی دیکھتے بر صغیر کے کروڑوں دلوں کی دھڑکن بن گیا تھا ۔ 20 سال قبل انہوں نے اپنا شہر ہ آفاق البم ’آزادی‘ پیش کیا جس کے بعد جنون واقعی موسیقی کے مداحوں کا جنون بن گیا تھا۔

جنون

کروڑوں دلوں کی دھڑکن بنے اس بینڈ کے گٹارسٹ سلمان احمد اور گلوکار علی عظمت کے درمیان اختلافات کے سبب عوام میں دیوانگی کی حد تک مقبول یہ بینڈ13 سال قبل بکھر گیا تھا ۔ اس کے بعد سے موسیقی کے شائقین صوفی راک میوزک سننے کو ترس ہی گئے تھے ۔ گزشتہ سال بینڈ کے گٹارسٹ سلمان احمد نے اشارے دینا شروع کیے کہ وہ ایک بار پھر بینڈ کو یکجا کرنے کے لیے کوشاں ہیں۔

اس مقصد کے لیے انہوں نے مختلف ٹی وی انٹرویوز میں بھی اپنی اس خواہش کا اظہار کیا اور سوشل میڈیا کا سہارا لیتے ہوئے اپنے گروپ کی ماضی کی تصاویر شیئر کرنا شروع کی تو عوام کی جانب سے بینڈ کے دوبارہ متحد ہونے کا مطالبہ زور پکڑ گیا۔

جنون

گزشتہ برس کوک اسٹوڈیو نے اس بینڈ کے سب سے مقبول گانے ’سیونی‘ کو اپنے سیزن کے لیے ریکارڈ کیا تو اس میں سلمان احمد تو گٹاربجاتے دکھائی دیے تاہم علی عظمت کی جگہ راحت علی خان اور علی نور اس مشہور زمانہ گانے کو گارہے تھے ۔ اس ویڈیو کے ریلیز ہوتے ہی سوشل میڈیا پر گویا ایک کہرام مچ گیا ، ہر کسی نے ’ جنون بینڈ کی ماضی کی ویڈیو شیئر کرکے مطالبہ کیا کہ یہ گانا صرف علی عظمت اور سلمان احمد کے لیے ہی بنا ہے۔

جنون

بینڈ کی اس مقبولیت اور عوامی اصرار کو مدنظر رکھتے ہوئے علی عظمت ، سلمان احمد اور برائن ایک بار پھر اپنے آپس کے اختلافات بھلا کر یکجا ہوئے ہیں اور نوجوانوں کے دل کی دھڑکن یہ بینڈ  ایک بار پھر ان کے دلوں کو گرما رہا ہے۔

Comments

comments

یہ بھی پڑھیں