اسلام آباد: صدر مملکت کی منظوری سے وزارت قانون نے نوٹیفکیشن جاری کرتے ہوئے جسٹس عالیہ نیلم کو باضابطہ طور پر چیف جسٹس لاہور ہائی کورٹ تعینات کر دیا۔
جسٹس عالیہ نیلم کل لاہور ہائی کورٹ کی پہلی خاتون چیف جسٹس کا حلف لیں گی۔ حلف برداری کی تقریب کل صبح ساڑھے 9 بجے گورنر ہاؤس لاہور میں ہوگی۔
گورنر پنجاب سردار سلیم حیدر جسٹس عالیہ نیلم سے عہدے کا حلف لیں گے۔
دو جولائی کو ججز کی تقرری سے متعلق سپریم جوڈیشل کمیشن میں اجلاس ہوا تھا جس میں جسٹس عالیہ نیلم کو لاہور ہائی کورٹ کی پہلی خاتون چیف جسٹس نامزد کیا گیا تھا۔
سپریم کورٹ جوڈیشل کمیشن نے جسٹس عالیہ نیلم کے نام کی متفقہ طور پر منظوری دی تھی۔
جسٹس عالیہ نیلم 12 نومبر 1966 کو پیدا ہوئیں جبکہ انہوں نے 1995 میں پنجاب یونیورسٹی سے ایل ایل بی کی ڈگری حاصل کی تھی۔ انہوں نے یکم فروری 1996 کو بطور وکیل پریکٹس کا آغاز کیا تھا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں