لاہور : سپریم کورٹ کے جج جسٹس آصف سعید کھوسہ نے قائم مقائم چیف جسٹس آف پاکستان کا حلف اٹھا لیا، چیف جسٹس میاں ثاقب نثار بیرون ملک دورے پر ہیں۔
سپریم کورٹ لاہور رجسٹری میں قائم مقائم چیف جسٹس کی حلف برداری کی تقریب ہوئی ، جس میں جسٹس آصف سعید کھوسہ نے اپنے عہدے کا حلف اٹھایا،سپریم کورٹ کے جج جسٹس منظور احمد ملک نے ان سے عہدے کا حلف لیا۔
تقریب حلف برداری میں رجسٹرار اور عدالتی عملے نے شرکت کی۔
حلف برداری کے بعدقائم مقائم چیف جسٹس پاکستان آصف سعید کھوسہ نے لاہور میں عدالت لگائی، جسٹس منظور احمد ملک بنچ میں شامل تھے، دو رکنی بنچ نےفوجداری اپیلوں کی سماعت کی، اس موقع پرسپریم کورٹ لاہور رجسٹری کی سکیورٹی سخت کر دی گئی۔
قائم مقائم چیف جسٹس کی سربراہی میں دو رکنی بنچ جمعہ تک فوجداری اپیلوں کی سماعت کرے گا۔
خیال رہے چیف جسٹس آف پاکستان میاں ثاقب نثار ترکی کے دورہ پر بیرون ملک ہیں، چیف جسٹس 17دسمبر کو ترکی میں منائی جانے والی مولانارومی کی یاد میںسالانہ روحانی شب ’’شب عروس ‘‘ میں بھی شرکت کریں گے۔
بعد ازاں چیف جسٹس عمرے کی سعادت حاصل کرنے سعودی عرب بھی جائیں گے۔
چیف جسٹس میاں ثاقب نثار کو ترکی کے سفیر نے ترکی کی آئینی عدالت کے سربراہ کی جانب سے دعوت دی تھی۔
واضح رہے کہ آئین پاکستان کے تحت چیف جسٹس آف پاکستان کا عہدہ خالی نہیں رکھا جاسکتا، چیف جسٹس کی غیر موجودگی کی صورت میں سینیر ترین جج عارضی طور پر چیف جسٹس کی ذمہ داریاں سنبھالتے ہیں۔
