اسلام آباد: وفاقی دارالحکومت میں کرونا کے وار تیز، اسلام آباد ہائی کورٹ کے جسٹس محسن اختر کیانی بھی اس وبا کا شکار ہوگئے ہیں۔
تفصیلات کے مطابق اسلام آباد ہائی کورٹ کے جسٹس محسن اختر کیانی کرونا وائرس کا شکار ہوگئے ہیں، معزز جج نے طبیعت ناسازی کے باعث کرونا ٹیسٹ کرایا، جس کا نتیجہ مثبت آیا، رپورٹ مثبت آنے کے بعد جسٹس محسن اختر نے خود کو قرنطینہ کرلیا ہے۔
ذرائع کا کہنا ہے کہ جسٹس محسن اختر کیانی کی عدالت کا عملہ بھی کرونا میں مبتلا ہوا ہے، جس کے باعث کورٹ روم نمبر تین کو بند کردیا گیا ہے جبکہ جسٹس کیانی کی کورٹ کے تمام کیسز کی کاز لسٹ منسوخ کردی گئی ہیں۔
یہ بھی پڑھیں: جسٹس قاضی فائز عیسیٰ، اہلیہ میں بھارتی ویئرینٹ کی علامات
اس سے قبل سپریم کورٹ کے جسٹس قاضی فائز عیسیٰ اور ان کی اہلیہ سرینا عیسیٰ بھی کرونا وائرس کا شکار ہوکر قرنطینہ میں ہیں، سپریم کورٹ کے معزز جج اور ان کی اہلیہ میں ڈیلٹا ویرئنٹ کی علامات پائی گئیں ہیں۔
ذرائع کے مطابق جسٹس قاضی فائز عیسیٰ اور اہلیہ نے عید سے قبل کراچی کا سفر کیا تھا، کراچی سے واپسی پر جسٹس قاضی فائز عیسیٰ اور اہلیہ کی طبیعت ناساز ہوئی۔
واضح رہے کہ پاکستان میں کورونا کی چوتھی لہر شدت اختیار کرتی جارہی ہے، جس کے باعث ایک دن میں مزید 86 مریض جاں بحق اور 4500 سے زائد کیسز رپورٹ ہوئے۔
این سی او سی کے مطابق ملک میں 24 گھنٹوں میں کورونا کے 58ہزار203 ٹیسٹ کیے گئے، جن میں سے 4 ہزار 537 مثبت نکلے اور اس دوران کوروناکےٹیسٹ مثبت آنےکی شرح7.79 فیصد رہی۔
این سی او سی کے مطابق ملک میں24گھنٹےمیں کورونامیں مبتلا مزید86 افرادانتقال کرگئے، جس کے بعد ملک میں کورونا وائرس سے مجموعی اموات کی تعداد 23 ہزار 295 تک جاپہنچی ہے۔
