اوٹاوا: امریکی صدر ٹرمپ کی جانب سے ملک میں مسلمانوں کے داخلے پر پابندی کی مخالفت کرتے ہوئے کینیڈین وزیراعظم جسٹن ٹروڈو نے کہا ہے کہ ایسے تمام لوگ اور پناہ گزین جو دہشت گردی اور جنگ سے متاثر ہیں انہیں کینیڈا خوش آمدید کہتا ہے۔
تفصیلات کے مطابق اپنے منفرد انداز اور روشن خیالی کے باعث کینیڈا کے وزیراعظم بننے والے جسٹن ٹروڈو نہ صرف اپنے ملک بلکہ دنیا بھر میں بسنے والے مسلمانوں کے لیے آئیڈیل شخصیت کے طور پر ابھر کر سامنے آئے ہیں۔
سماجی رابطے کی ویب سائٹ پر جاری ایک بیان میں کینیڈین وزیر اعظم نے ٹرمپ کے اعلان کی مخالفت کرتے ہوئے بیان جاری کیا کہ ایسے تمام لوگ جو امریکا میں مظالم، دہشت گردی اور جنگ سے متاثر ہیں انہیں کینیڈا خوش آمدید کہتا ہے۔
To those fleeing persecution, terror & war, Canadians will welcome you, regardless of your faith. Diversity is our strength #WelcomeToCanada
— Justin Trudeau (@JustinTrudeau) January 28, 2017
انہوں نے مزیدکہا کہ کینیڈا کی حکومت اور عوام آپ کو مذہب اور رنگ و نسل سے بالاتر ہوکر خوش آمدید کہے گا ساتھ ہی انہوں نے ’’ویلکم ٹو کینیڈا‘‘ کا ہیش ٹیگ استعمال کیا۔
یاد رہے شام میں جنگ سے متاثر ہونے والے مہاجرین پر جب تمام ممالک نے پابندی عائد کردی تھی اسی وقت کینیڈا کے نوجوان وزیراعظم نے 40 ہزار شامی مہاجرین کو ملک میں داخلے کی اجازت دی تھی۔ کینیڈین وزیراعظم کے اس اقدام پر مسلمانوں نے اظہار مسرت کیا تھا۔