The news is by your side.

Advertisement

کے الیکٹرک کراچی میں‌ 900 میگا واٹ کا پاور پلانٹ لگائے گی

کراچی: کے الیکٹرک کی جانب سے کراچی میں لوڈ شیڈنگ کے خاتمے کے لیے 900 میگا واٹ کا پلانٹ لگایا جائے گا جس کی تعمیر نیپرا کی جانب سے دیے جانے والے ٹیرف ریٹس سے مشروط ہوگی، بن قاسم پاور پلانٹ کے اندر نیا پلانٹ لگانے کے لیے تیاریاں کی جارہی ہیں۔

کے الیکٹرک کے چیف مارکیٹنگ آفیسر سید فخر نے کراچی بن قاسم پاور پلانٹ میں میڈیا سے گفتگو کرتے ہوئے کہا کہ نیپرا کے ملٹی ایئر ٹیرف پر کے الیکٹرک کو تحفظات ہیں، کے الیکٹرک نیپرا کے متعین کردہ ملٹی ایئر ٹیرف کا تکنیکی جائزہ لے رہا ہے۔

سید فخر کے مطابق بن قاسم میں 900 میگا واٹ کے منصوبے کے لیے جو ٹیرف دیا ہے اس کے باعث 900 میگا واٹ پاور پلانٹ کے منصوبے میں سرمایہ کاری کو نقصان ہوگا کیوں کہ جو نیا ٹیرف ملا ہے وہ کے الیکٹرک کی توقعات کے مطابق نہیں ہے۔

بجلی کی پیداوار کے حوالے سے ترجمان کے الیکٹرک سعدیہ کا کہنا تھا کہ 2009 سے اب تک 1057 میگا واٹ بجلی سسٹم میں شامل کردی گئی ہے جب کہ بن قاسم میں 1 ارب 20 کروڑ روپے کی لاگت سے تعمیر کے جانے والے پاور پلانٹ کی تعمیر میں تین سال کا عرصہ لگے گا۔

کے الیکٹرک انتظامیہ کا موقف ہے کہ نیپرا کی جانب سے جاری کردہ ٹیرف پر تحفظات ہیں اگر ٹیرف میں اضافہ نہیں کیا جاتا تو منصوبہ تعطل کا شکار ہو سکتا ہے جس سے سب سے زیادہ نقصان عوام کو لوڈ شیڈنگ میں اضافے کی صورت میں ہوگا۔

Print Friendly, PDF & Email

Comments

comments

یہ بھی پڑھیں