(6 فروری 2026): کراچی الیکٹرک کے سی ای او مونس علوی نے استعفیٰ دے دیا ہے نئے سی ای او کے لیے تین نام شارٹ لسٹڈ کر لیے گئے۔
شہر قائد کو بجلی فراہم کرنے والے ادارے کراچی الیکٹرک (کے الیکٹرک) کے سی ای او مونس علوی نے اپنے عہدے سے استعفیٰ دے دیا ہے اور کے الیکٹرک بورڈ آف ڈائریکٹرز کے چیئرمین مارک اسکیلٹن نے ان کا استعفیٰ منظور کرتے ہوئے پاکستان اسٹاک ایکسچینج کو آگاہ بھی کر دیا ہے۔
کے الیکٹرک کے نئے سی ای او کے لیے تین ناموں کو شارٹ لسٹ کر لیا گیا ہے اور تینوں افراد کا تعلق کراچی شہر سے ہی ہے، جو انرجی اور فنانس سیکٹر کا وسیع تجربہ رکھتے ہیں۔
کے الیکٹرک بورڈ میٹنگ اگلے ہفتے منعقد ہوگی اور بورڈ آف ڈائریکٹرز کا الیکشن رمضان المبارک میں منعقد ہوگا۔ کے الیکٹرک کا نیا بورڈ ہی نیا چیف ایگزیکٹو مقرر کرے گا۔
موجودہ بورڈ تینوں شارٹ لسٹ کیے گئے افراد کے انٹرویوز کر کے نئے بورڈ کو رپورٹ جاری کرے گا، جو نئے سی ای او کی تقرری کا حتمی فیصلہ کرے گا۔
کے الیکٹرک کے بورڈ ممبرز کی مجموعی تعداد 13 ہے اور طویل عرصے سے کے الیکٹرک کے تین بورڈ ممبرز کی نشست خالی ہے جب کہ مونس علوی کے استعفی دینے کے بعد موجودہ بورڈ ممبرز کی تعداد 9 رہ گئی ہے۔
واضح رہے کہ مستعفی سی ای او کے الیکٹرک ان دنوں عمرے پر ہیں۔ انہوں نے 18 سال تک کراچی الیکٹرک میں خدمات انجام دیں اور سب سے طویل مدت تک کے الیکٹرک کے سی ای او رہے ہیں۔
سید مونس عبداللہ علوی نے سی ای او کے-الیکٹرک کے عہدے سے استعفی دے دیا ہے، ترجمان کے-الیکٹرک
یہ معلومات باقاعدہ طور پر پاکستان اسٹاک ایکسچینج (پی ایس ایکس) کو فراہم کر دی گئی ہیں، ترجمان کے-الیکٹرک
ادارے ہمیشہ افراد سے بڑھ کر ہوتے ہیں اور ادارے کی بہتری ہمیشہ ہماری اولین ترجیح… pic.twitter.com/ur8l3SqMDY
— Imran Rana, Spokesperson, K-Electric (@imranrana21) February 6, 2026
انجم وہاب اے آر وائی نیوز سے وابستہ ہیں اور تجارت، صنعت و حرفت اور دیگر کاروباری خبریں دیتے ہیں