کراچی: کے الیکٹرک نے صارفین کا ٹیرف پورے ملک کے برابر کردیا، بجلی کے نرخوں میں 3 روپے تک کا اضافہ کردیا گیا۔
تفصیلات کے مطابق کے الیکٹرک نےکراچی والوں کے لیے بجلی کے نرخوں میں 2.15 سے 3.37 روپے تک کا اضافہ کردیا۔ ترجمان کے الیکٹرک کے مطابق شہر قائد کے مکینوں کو اضافی بل اگلے ماہ سے ادا کرنا ہوں گے۔
ترجمان کا کہنا ہے کہ پیک اور آف پیک آورز کا نظام بھی متعارف کروا دیا گیا ہے، پیک آورز کے نرخ بڑھا دیے گئے ہیں۔ صارفین سے بینک چارجز اور میٹر رینٹ کی مد میں علیحدہ رقم نہیں لی جائے گی۔
پیک آورز کا نظام 5 کلو واٹ اور اس سے زائد بجلی استعمال کرنے والوں کے لیے متعارف کروایا گیا ہے۔ 300 سے 700 یونٹ ماہانہ استعمال کے نرخ 17 روپے 33 پیسے مقرر کیے گئے ہیں جبکہ 700 یونٹ سے زائد کے استعمال پر 20.70 روپے فی یونٹ ادا کرنا ہوں گے۔
ترجمان کا کہنا ہے کہ کمرشل صارفین کے نرخ بھی بڑھائے گئے ہیں۔ کے الیکٹرک نے عدالت سے اسٹے آرڈر واپس لیے جانے کے بعد بجلی کے نرخ بڑھائے ہیں۔ کے الیکٹرک نے سنہ 2018 میں نیپرا کے مقرر کردہ نرخ کو چیلنج کیا تھا، 2018 میں دائر درخواست اپریل 2019 میں واپس لے لی گئی تھی۔
خیال رہے کہ گزشتہ روز نیپرا نے بجلی 55 پیسے فی یونٹ مہنگی کردی تھی جس سے صارفین پر 5 ارب 20 کروڑ روپے کا بوجھ پڑے گا، اضافہ اپریل کی ماہانہ فیول پرائس ایڈجسٹمنٹ کی مد میں کیا گیا ہے۔
