کراچی : نیشنل گرڈ میں ہونے والی ٹرپنگ کے نتیجے میں شہر قائد میں بجلی کے تعطل کے بعد ترجمان کے الیکٹرک نے کہا ہے کہ کراچی میں بجلی کی فراہمی کی صورتحال کا مستعدی سے جائزہ لے رہے ہیں۔
ترجمان نے ایک جاری بیان میں بتایا کہ ملنے والی رپورٹس کے مطابق نیشنل گرڈ میں آنے والی خرابی کے باعث پیر کی صبح 7:34 بجے سسٹم کی فریکونسی یکدم کم ہوگئی جس کے باعث ملک بھر میں بجلی کی فراہمی متاثر ہوئی اور کراچی سمیت ملک کے متعدد شہروں میں بجلی کی فراہمی معطل ہوگئی۔
ترجمان کا کہنا ہے کہ خوش آئند بات یہ ہے کہ کےالیکٹرک کے سسٹم میں موجود حفاظتی نظام کی بدولت انفرا اسٹرکچر محفوظ رہا۔
کے الیکٹرک کا عملہ مکمل طور پر متحرک ہے اور کراچی بھر میں بجلی کی بحالی کے عمل کی براہ راست نگرانی کر رہا ہے، عملے کے ارکان متعلقہ حکام سے بھی رابطے میں ہیں تاکہ کراچی اور نیشنل گرڈ کے درمیان لنک دوبارہ قائم کرکے شہرکو بلاتعطل بجلی کی فراہمی کا عمل تیز کیا جاسکے۔
انہوں نے کہا کہ کے الیکٹرک سسٹم کے استحکام کو ترجیح دیتے ہوئے احتیاط کے ساتھ آگے بڑھ رہی ہے، اسٹریٹجک تنصیبات جیسے کہ ایئرپورٹ، کراچی پورٹ اور اسپتالوں کی بجلی سب سے پہلے بحال کی گئی، اس کے بعد شہر کے چند علاقوں میں بجلی جزوی طور پر بحال کردی گئی ہے۔
ترجمان کا کہنا ہے کہ ہم پر امید ہیں کہ شہر کے زیادہ تر رہائشی اور کمرشل علاقوں میں بجلی کی فراہمی اگلے 3 سے 4 گھنٹوں میں بحال کر دی جائے گی لیکن شہر کو بجلی کی مکمل فراہمی خاص طور سے صنعتی صارفین کو بجلی کی فراہمی نیشنل گرڈ سے مستحکم بجلی کی فراہمی پر منحصر ہے جس میں مزید وقت لگ سکتا ہے۔
ترجمان نے صارفین کو مخاطب کرتے ہوئے کہا کہ کے الیکٹرک معیشت کو رواں رکھنے کیلئے بجلی کی بلا تعطل فراہمی کو یقینی بنانے کیلئے تمام ممکنہ اقدامات لے رہا ہے اس حوالے سے کسٹمرز کو ہونے والی پریشانی پر ہم معذرت خواہ ہیں۔
