کراچی: شادی بیاہ ایک ایسی تقریب ہوتی ہے جسے ہر کوئی یادگار بنانا چاہتا ہے، اور اس کے لیے لوگ نت نئے انداز اپناتے ہیں، خاتون کرکٹر کائنات امتیاز نے بھی اپنی شادی پر ایک دیرینہ خواہش پوری کرتے ہوئے اسے یادگار بنا دیا ہے۔
قومی خواتین کرکٹ ٹیم کی آل راؤنڈر کھلاڑی کائنات امتیاز نے شادی کے بعد سوشل میڈیا پر ایک خصوصی فوٹوشوٹ شیئر کیا ہے، جسے صارفین نے بے حد پسند کیا۔
کائنات امتیاز کا کہنا ہے کہ ان کی بڑی خواہش تھی کہ وہ شادی کے سرخ جوڑے میں کرکٹ بیٹ اور بال کے ساتھ فوٹو شوٹ کروائے، انسٹاگرام اور ٹویٹر اکاؤنٹ پر تصاویر شیئر کرتے ہوئے آل راؤنڈر نے لکھا کہ یہ میری فیورٹ سولو تصاویر میں سے ایک ہیں۔
تصاویر میں کائنات امتیاز نے مختلف پوز دیے ہیں، کسی میں وہ کریز پر وکٹوں کے ساتھ بلا تھامے گیند کو ہٹ کرنے کے لیے تیار نظر آ رہی ہیں، کسی میں وہ ایک ہاتھ میں بیٹ تھامے دوسرے سے گیند کو فضا میں اچھال کر دیکھ رہی ہیں۔
انسٹاگرام پر صارفین نے اس ویڈنگ فوٹوشوٹ پر دل چسپ کمنٹ کیے، ایک صارف نے لکھا کہ اس نے پہلی برائیڈل شوٹ دیکھی، بیٹ پکڑے ہوئے۔ ایک اور صارف نے لکھا کہ بیٹ کو جتنی عزت دیں گی اتنی عزت آپ کو کرکٹ میں ملے گی۔
Cricket-themed photoshoot. 😍
Always wanted this. 🏏
Allhumdulillah.Some of my favourite solo’s 🥰#cricketlover #cricketer #lifeofacricketer #KT23 pic.twitter.com/9C5SyrBpzG
— Kainat Imtiaz (@kainatimtiaz16) May 15, 2022
سوشل میڈیا پر کائنات امتیاز کی یہ تصویریں تیزی سے وائرل ہو رہی یں، جن میں کائنات واقعی بے حد خوب صورت نظر آ رہی ہیں اور ان کا اسٹائل بھی بہت پسند کیا جا رہا ہے۔
یاد رہے کہ کائنات امتیاز کی شادی 30 مارچ 2022 کو محمد وقار الدین سے ہوئی تھی، 26 مارچ کو انھوں نے اپنی آفیشل سوشل میڈیا پیجز پر نکاح کی تصاویر بھی شیئر کی تھیں۔
