کروڑوں روپے ٹیکس ادائیگی کے باوجود رشوت مانگی جارہی ہے، کپل -
The news is by your side.

Advertisement

کروڑوں روپے ٹیکس ادائیگی کے باوجود رشوت مانگی جارہی ہے، کپل

بمبئی: معروف بھارتی کامیڈین اور بالی ووڈ اداکار کپل شرما نے بھارتیہ جنتا پارٹی اور مودی حکومت کی کارکردگی پر غصے کا اظہار کرتے ہوئے سخت ناراضی کا اظہار کردیا۔

تفصیلات کے مطابق اپنے کامیاب کامیڈی شو اور حاضری جوابی سے عوام میں پذیرائی حاصل کرنے والے فنکار ’’کپل شرما‘‘ نے سماجی رابطے کی ویب سائٹ پر مودی حکومت کی کارکردگی پر شدید غصے اور ناراضی کا اظہار کردیا۔

کپل شرما نے اپنے ایک ٹوئٹ میں کہا کہ ’’ان کم ٹیکس کے نام پر گزشتہ پانچ سالوں سے 15 کروڑ روپے ادائیگی کے باوجود مجھے اپنا دفتر بنانے کےلیے بمبئی میونسپل کارپوریشن (بی ایم سی) کو 5 لاکھ روپے رشوت ادا کرنی ہوگی‘‘۔

انہوں نے اپنے ایک اور ٹوئٹ میں اپنے غصے کا اظہار کرتے ہوئے بھارتی وزیر اعظم نریندر مودی پر کڑی تنقید کرتے ہوئے کہا کہ ’’کیا یہ ہیں وہ اچھے دن جن کے بارے میں عوام کو الیکشن مہم کے دوران بتایا گیا تھا‘‘۔


بی ایم سی کا شمار بھارت میں سب سے زیادہ پیسے کمانے والے اداروں میں ہوتا ہے جس کو بلدیاتی حکومت کا درجہ بھی دیا گیا ہے۔ اس ادارے کا مکمل انتظام حکومتی پارٹی شدت پسند تنظیم اور حکمراں جماعت شیوسینا اور مرکزی حکومت بھارتیہ جنتا پارٹی کے پاس ہے۔

دوسری جانب میونسپل کارپوریشن کے ویج لینس ڈیپارٹمنٹ کے سربراہ نوہر پہنور نے کپل کے الزامات کی تردید کرتے ہوئے مطالبہ کیا کہ ’’کپل شرما سرکاری افسر کا نام سامنے لائیں جنہوں نے اُن سے رشوت کا تقاضہ کیا، مکمل چھان بین کے بعد سرکاری افسر کے خلاف کارروائی عمل میں لائی جائے گی‘‘۔

علاوہ ازیں بھارتی ریاست مہاراشٹرکے وزیر اعلیٰ دیویندرا نے اداکار کو یقین دہانی کرواتے ہوئے کہاکہ ’’وہ اُس شخص کے بارے میں اطلاع دیں اُس کے خلاف سخت کارروائی کے احکامات جاری کیے جائیں گے ۔ اداروں میں ایسے لوگوں کی کوئی گنجائش نہیں ہے‘‘۔

کپل نے وزیر اعلیٰ کا شکریہ اداکرتے ہوئے کہا کہ ’’میں جلد آپ سے ملاقات کر کے اس بارے میں تفصیلی گفتگو کروں گا ‘‘۔

یاد رہے بھارتی میڈیا رپورٹس کے مطابق کپل شرما اپنے کامیڈی شو کی ہر قسط پر 60 سے 80 لاکھ ہندوستانی روپے کماتے ہیں، اس حساب سے وہ تقریباً ہر ماہ 6 کروڑ روپے تک معاوضہ باآسانی حاصل کرتے ہیں تاہم گزشتہ دنوں کپل سے متعلق خبریں سامنے آئی ہیں کہ ’’وہ کئی بالی ووڈ اداکاروں سے زیادہ معاوضہ حاصل کررہے ہیں‘‘۔

Comments

comments

یہ بھی پڑھیں