معروف بھارتی کامیڈین کپل شرما نے انکشاف کیا ہے کہ وہ اپنے کامیڈی شو میں اداکاراؤں سے فلرٹ دراصل چینل مالکان کی فرمائش پر کرتے ہیں۔
معروف کامیڈین کپل شرما کے مداح دنیا بھر میں موجود ہیں جو ان کی حاضر جوابی اور حس مزاح کو بے حد پسند کرتے ہیں۔
حال ہی میں کپل نے اداکارہ شہناز گل کے یوٹیوب چینل کے شو دیسی وائبز میں شرکت کی اور اپنی ذاتی و پیشہ وارانہ زندگی کے بارے میں گفتگو کی۔
ایک موقع پر شہناز نے شکوہ کیا کہ وہ اپنے شو میں آنے والی اداکاراؤں کے ساتھ بہت فلرٹ کرتے ہیں جس پر کپل شرما نے انکشاف کیا کہ یہ سب اسکرپٹ کا حصہ ہوتا ہے۔
انہوں نے کہا کہ انہیں چینل کی طرف سے باقاعدہ فرمائش کی گئی کہ وہ اداکاراؤں کے ساتھ فلرٹ کیا کریں۔
کپل شرما کا کہنا تھا کہ شادی کے بعد انہیں اس قسم کی گفتگو کرنے میں شرم آتی تھی، اس کے بعد 2 بچے ہوگئے تو میں مزید سنجیدہ ہوگیا، لہٰذا جو بھی اداکارہ شو پر آتی تھیں تو میں سیدھا سیدھا ان سے کام کے متعلق گفتگو کرتا تھا۔
انہوں نے کہا کہ لیکن پھر مجھے ایک دن چینل کی طرف سے ای میل آئی کہ وہ میرا فلرٹ کرنے کا پہلو یاد کر رہے ہیں۔
کپل کا کہنا تھا کہ ای میل میں باقاعدہ ایک سروے بھی منسلک تھا جس میں لوگوں نے کہا تھا کہ وہ کپل شرما کا اداکاراؤں کے ساتھ فلرٹ کرنا مس کر رہے ہیں۔
