The news is by your side.

Advertisement

کراچی، ڈکیتیوں کی سنچری کرنے والا 5 رکنی گروہ گرفتار

کراچی: اسپیشل انویسٹی گیشن یونٹ (ایس آئی یو) نے کراچی کے مختلف علاقوں میں ٹارگٹڈ کارروائیاں کرتے ہوئے ڈکیتیوں کی سنچری کرنے والے 5 رکنی گروہ کو گرفتار کرلیا۔

اے آر وائی نیوز کی رپورٹ کے مطابق ایس آئی یو نے کراچی کے علاقوں نارتھ کراچی اور ناگن چورنگی میں کارروائیوں کے دوران 100 سے زائد ڈکیتیوں کے مقدمات میں مطلوب ملزمان کا 5 رکنی گروہ گرفتار کرلیا ، ملزمان کے قبضے سے اسلحہ، موٹرسائیکلیں اور لوٹا ہوا سامان برآمد کرلیا گیا۔

ایس ایس پی عرفان بہادر کے مطابق گرفتار ملزمان بینکوں سے رقم لے کر نکلنے والے شہریوں کو ہی نشانہ بناتے تھے، ملزمان نے 100 سے زائد وارداتوں میں کروڑوں روپے لوٹنے کا انکشاف کیا۔

پولیس کے مطابق اس گروہ کا ایک ساتھی بینک میں بڑی رقم نکلوانے والے شہری کی ریکی کرتا اور باہر موجود ساتھیوں کو آگاہ کرتا تھا جو شہری کو لوٹ کر فرار ہوجاتے تھے۔

واضح رہے کہ رواں سال اورنگی ٹاؤن اور سائٹ میں ملزمان بینک سے رقم لے کر نکلنے والے شہریوں سے لاکھوں روپے لوٹ کر فرار ہوگئے تھے جس کی سی سی ٹی وی فوٹیج سامنے آئی تھی، فوٹیج میں ملزمان کے ساتھی کو بینک میں ریکی کرتے دیکھا گیا تھا۔

ایس ایس پی عرفان بہادر کا کہنا تھا کہ اس گروہ کی وارداتوں کا کوئی کرمنل ریکارڈ موجود نہیں، ملزمان اس سے قبل کبھی گرفتار نہیں ہوئے، ملزمان کو شہر کے مختلف تھانوں میں درج متعدد مقدمات میں بھی گرفتار کیا جارہا ہے۔

پولیس کے مطابق گرفتار ملزمان نے انویسٹی گیشن ٹیم کو 30 سے زائد وارداتوں کے مقامات کی نشاندہی کی ہے جس کی بنا پر دیگر ملزمان کی گرفتاری عمل میں لائی جائے گی۔

ایس ایس پی عرفان بہادر کا کہنا ہے کہ گرفتار ملزمان کے قبضے سے اسلحہ، ایمونیشن، 2 موٹرسائیکلیں، 2 لاکھ نقدی، شہریوں سے لوٹی گئی دیگر اشیا برآمد کرلی گئی ہیں۔

Comments

یہ بھی پڑھیں