کراچی: شہر قائد کے علاقے لانڈھی میں شوہر نے بیوی اور بیٹے کو قتل کرکے خودکشی کرلی۔
اے آر وائی نیوز کی رپورٹ کے مطابق لانڈھی کے علاقے قذافی ٹاؤن میں گھریلو تنازع پر شوہر نے فائرنگ کرکے بیوی اور بیٹے کو قتل کرکے خودکشی کرلی۔
پولیس کا کہنا ہے کہ شوہر نے اپنی 40 سالہ بیوی اور 18 سالہ بیٹے کو قتل کیا، ملزم نے بیوی اور بیٹے کو قتل کرنے کے بعد خود کو گولی مار کر خودکشی کرلی۔
پولیس کے مطابق جاں بحق افراد کی شناخت 50 سالہ رضوان، 40 سالہ فاطمہ بیوی اور 18 سالہ وقاص کے ناموں سے ہوئی ہے۔
تھانہ شاہ لطیف ٹاؤن پولیس کا کہنا ہے کہ فائرنگ کا واقعہ گھریلو ناچاقی کا شاخسانہ ہے، آلہ قتل برآمد کرلیا گیا، جائے وقوعہ سے شواہد اکٹھے کرلیے گئے ہیں، عینی شاہدین کے بیانات قلمبند کیے جارہے ہیں۔
پولیس کا کہنا ہے کہ واقعے کی تمام پہلوؤں سے تحقیقات کی جارہی ہیں۔
ادھر ماڑی پور پولیس نے کارروائی کرتے ہوئے چوری و نقب زنی میں سرگرم ملزمان کو گرفتار کرلیا، پولیس نے ملزمان کے قبضے سے چوری شدہ رقم ایک لاکھ 75 ہزار روپے برآمد کرلی۔
پولیس کا کہنا ہے کہ گرفتار ملزمان میں نور محمد، امیر عبداللہ، عبدالوصی شامل ہیں، ملزمان سے اسلحہ برآمد کرکے مقدمات درج کرلیے گئے ہیں، ملزمان کو سی سی ٹی وی فوٹیج کی مدد سے گرفتار کیا گیا۔
