کراچی: شہر قائد میں پولیس کے مبینہ تشدد سے ایک اور ملزم دم توڑ گیا، لواحقین نے اسپتال کے باہر احتجاج کرتے ہوئے انصاف کی فراہمی کا مطالبہ کیا ہے۔
تفصیلات کے مطابق کراچی میں مبینہ پولیس تشدد سے ملزم جاں بحق ہوگیا، اسٹیل ٹاؤن پولیس نے ملزم عبدالقادر کو غیرقانونی اسلحہ رکھنے کے الزام میں حراست میں لیا تھا۔
عبدالقادر کے اہلخانہ نے جناح اسپتال کے باہر پولیس کے خلاف احتجاج کرتے ہوئے اعلیٰ حکام سے انصاف کی فراہمی کا مطالبہ کیا ہے۔
پولیس کا کہنا ہے کہ گرفتاری کے وقت ملزم زخمی تھا، حالت بگڑنے پر اسپتال منتقل کیا لیکن جانبر نہ ہوسکا۔
نمائندہ اے آر وائی نیوز کے مطابق ملزم کو لانڈھی پولیس کے حوالے کیا گیا تھا جہاں وہ ڈکیتی کے مقدمے میں مفرور تھا۔
مزید پڑھیں: کراچی میں مبینہ پولیس تشدد سے شہری جاں بحق
مقتول کے بھائی ذیشان نے میڈیا سے گفتگو کرتے ہوئے کہا کہ اسٹیل ٹاؤن پولیس نے بھائی کو گرفتار کیا، گرفتاری کی اطلاع رات 4 بجے موصول ہوئی تھی، صبح تھانے پہنچا تو بھائی نیم بے ہوشی کی حالت میں پڑا تھا۔
ذیشان کے مطابق عبدالقادر کے چہرے اور جسم پر تشدد کے واضح نشانات موجود تھے، بھائی کو بچانے کے لیے پولیس افسر علی حسنین نے 10 ہزار روپے رشوت لی تھی۔
عبدالقادر کے بھائی کا کہنا ہے کہ تھانے کے مختلف اہلکاروں کو چائے پانی کی مد میں بھی رقم فراہم کی، پولیس نے بھائی کو کورٹ لے جانے کے بجائے لانڈھی پولیس کے حوالے کیا۔
بھائی ذیشان کا کہنا ہے کہ عدالت پہنچنے پر جج صاحب نے عبدالقادر کےفوری علاج کا حکم دیا تھا تاہم عدالتی حکم کے باوجود بھائی کو اسپتال منتقل نہیں کیا گیا تھا۔
