کراچی : انسداد دہشت گردی کی عدالت نے ایم کیو ایم کے قائد کے علاوہ نامزد میئر کراچی وسیم اختر اور پچیس سے زائد رہنماؤں کے وارنٹ گرفتاری جاری کردی۔
انسداددہشتگردی کی عدالت میں دہشتگردووں کوسہولت فراہم کرنے ،اشتعال انگیز تقاریر کیس کی سماعت ہوئی، ملزمان کیخلاف وارنٹ گرفتاری جاری کردی گئی۔
انسدادِ دہشتگردی کی عدالت سے جاری ہونیوالے ناقابل ضمانت وارنٹ گرفتاری ایم کیوایم کے قائد الطاف حسین اور نامزد میئر کراچی وسیم اختر سمیت پچیس سے زائد ملزمان کیلئے جاری کیے گئے ہیں، جن اہم رہنماؤں کے ناقابل ضمانت وارنٹ گرفتاری جاری کیے گئے، ان میں فاروق ستار، رشید گوڈیل، خواجہ اظہار الحسن، قمر منصور،ریحان ہاشمی، خالد مقبول صدیقی بھی شامل ہیں۔
ملزمان پر اشتعال انگیز تقاریر کرنے اور دہشتگردوں کے سہولت کار ہونے کا الزام ہے، ایم کیوایم کے قائد کیجانب سے فوج کیخلاف تقاریر پرسو سے زائد مقدمات قائم ہوئے تھے، مختلف سیاسی جماعت کے کارکنوں، شہریوں اور سماجی کارکنوں کی جانب سے دائر مقدمات گڈاپ سٹی، سچل تھانہ، بن قاسم، اسٹیل ٹاؤن، ملیرکینٹ، سہراب گوٹھ اوردیگر تھانوں میں درج ہوئے۔
مقدمے میں شامل سابق صوبائی وزیر داخلہ سندھ روف صدیقی عبوری ضمانت پر ہیں، پولیس نے عدالت سے مفرور ملزمان کی گرفتاری کیلئے وقت مانگ لیا، جسکے بعد عدالت نے سماعت پندرہ جنوری تک ملتوی کردی۔
