اسلام آباد : سپریم کورٹ کے چیف جسٹس گلزار احمد نے 1995کی کراچی سرکلر ریلوے بحال کرنے کا حکم دیتے ہوئے کہا ہے کہ اس کی راہ میں آنے والی تمام رکاوٹیں ختم کی جائیں۔
تفصیلات کے مطابق کراچی سرکلر ریلوے سے متعلق سپریم کورٹ میں جاری اجلاس ختم ہوگیا، اجلاس میں چیف جسٹس گلزار احمد نے 1995کی کراچی سرکلر ریلوے بحال کرنے کا حکم دیتے ہوئے کہا کہ سرکلر ریلوے کی راہ میں آنے والی تمام رکاوٹیں ختم کی جائیں۔ انہوں نے کہا کہ گرین لائن ہو یا دیگر منصوبے انڈر پاسز اور فلائی اوورز بنائے جائیں،
اس کے علاوہ گرین، اورنج لائن منصوبے بھی جاری رکھے جائیں، سرکلر ریلوے بحالی کیلئے تمام وسائل بروئے کارلائے جائیں۔
علاوہ ازیں سپریم کورٹ نے کراچی کیلئے سی پیک منصوبہ بھی جاری رکھنے کا حکم دیا ہے۔
عدالت کا کہنا ہے کہ فوری اور دیرپا دونوں منصوبوں پر کام جاری رکھا جائے، جہاں انڈر پاسز یا فلائی اوورز بنانا پڑیں ان منصوبوں کو ایک سال میں مکمل کریں۔
