کراچی واٹر اینڈ سیوریج کارپوریشن کے ترجمان نے کہا ہے کہ واٹر کارپوریشن نے پانی کی لائن کی مرمت کامیابی سے مکمل کرلی ہے۔
تفصیلات کے مطابق شہرقائد کے کئی علاقوں میں پانی کی فراہمی میں تعطل آیا تھا جس کے بعد کراچی واٹر کارپوریشن نے شہر کی مرکزی پانی کی لائن کے مرمتی کام کو کامیابی سے مکمل کر لیا اور متاثرہ علاقوں میں پانی کی فراہمی شروع ہوگئی ہے۔
ترجمان کے مطابق مرمتی کام مکمل ہونے کے بعد دھابیجی پمپنگ اسٹیشن سے شہر میں پانی کی فراہمی بحال کر دی گئی ہے، اور شہر میں پانی کی فراہمی مرحلہ وار معمول کے مطابق بحال کی جائے گی۔
واٹر بورڈ ترجمان نے مزئد بتایا کہ واٹر کارپوریشن نے مرمتی کام کے لیے مجموعی طور 96 گھنٹے کا وقت مقرر کیا تھا اور کام کا آغاز پیر کے روز دوپہر 12 بجے کیا گیا۔
تاہم ادارے کی ٹیم نے دن رات محنت کرتے ہوئے مقررہ وقت سے 48 گھنٹے قبل ہی کام مکمل کر لیا اور پانی کی فراہمی ممکن بنائی۔
ترجمان نے کہا کہ مرمتی کام انتہائی اہم اور تکنیکی نوعیت کا تھا اور اس کے دوران شہریوں کو عارضی مشکلات کا سامنا کرنا پڑا جس پر واٹر کارپوریشن معذرت خواہ ہے۔
انھوں نے مزید کہا کہ مرمتی کام کے دوران ادارے کے تمام دستیاب وسائل بروئے کار لائے گئے تاکہ پانی کی فراہمی جلد از جلد بحال کی جا سکے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں