The news is by your side.

Advertisement

کراچی، رہائشی مکانات کی چھت سے تباہ شدہ جہاز کا کاک پٹ اتار لیا گیا

کراچی: حادثے کا شکار ہونے والے پی آئی اے طیارے کے باقی رہ جانے والے آلات کو اتارنے کے حوالے اہم پیش رفت ہوئی ہے۔

اے آر وائی نیوز کی رپورٹ کے مطابق رہائشی مکانات کی چھت سے تباہ شدہ جہاز کا کاک پٹ اتار لیا گیا، بھاری مشینری کی مدد سے لینڈنگ گیئر بھی اتار لیا گیا ہے۔

ذرائع کا کہنا ہے کہ کنکریٹ تلے دبے پارٹس کو نکالنے کے لیے کرین اور بھاری مشینری کا استعمال کیا گیا، جہاز کے دونوں پرزے کراچی ایئرپورٹ منتقل کردئیے گئے ہیں۔

ذرائع کے مطابق مکان کے ہیڈ ٹینک کے نیچے دبے جہاز کے انجن کو کل اتارا جائے گا جس کے لیے پاک فضائیہ کی ہائیڈرولک کرین منگوائی گئی ہے۔

مزید پڑھیں: طیارہ حادثہ، اہم شواہد پاکستان پہنچ گئے

طیارے کے انجن کو اتارنے کے لیے کرینوں کے علاوہ رہائشی مکان کو سپورٹنگ بیم اور جیک بھی لگائے جائیں گے، انجن کو اتارنے کے کام کی نگرانی سی اے اے، پی آئی اے انجینئرنگ اور ماہرین تعمیرات کریں گے، رات ہونے کے سبب ملبے تلے دبے پرزوں کو نکالنے کا کام روک دیا گیا ہے۔

واضح رہے کہ گزشتہ روز پاکستانی ٹیم کے سربراہ ایئر کموڈورعثمان غنی فرانسیسی تحقیقاتی ٹیم کی جانب سے ڈی کوڈ کیے گئے بلیک باکس سمیت تمام اہم ریکارڈ لے کر اسلام آباد پہنچے تھے۔

یاد رہے کہ 22 مئی جمعۃ الوداع کو لاہور سے کراچی آنے والا پی آئی اے کا طیارہ ایئرپورٹ کے قریب واقع ماڈل کالونی جناح گارڈن کی رہائشی آبادی پر گر کر تباہ ہوگیا تھا جس کے نتیجے میں 97 مسافر ہلاک جبکہ 2 مسافر معجزانہ طور پر بچ گئے تھے۔

Comments

یہ بھی پڑھیں