کراچی کے شہریوں نے روز روز کی وارداتوں سے تنگ آکر تنگ آمد بجنگ آمد کے مصداق ڈاکوؤں کو رنگے ہاتھوں پکڑ لیا، ٹھیک ٹھاک درگت بنا کر پولیس کے حوالے کردیا۔
تفصیلات کے مطابق کراچی کے بہادر شہری اسٹریٹ کرمنلز کیخلاف اپنی ہمت دکھانے لگے، شہر کے مختلف علاقوں میں رہزنوں کو قابو کرلیا، اس حوالے سے پولیس ذرائع کا کہنا ہے کہ کراچی میں آج 3اسٹریٹ کرمنلز کو شہریوں نے پکڑ کر پولیس کے حوالے کیا۔
اورنگی ٹاؤن میں علاقہ مکینوں نے2مبینہ اسٹریٹ کرمنلز کو پکڑ کر پہلے شدید تشدد کا نشانہ بنایا، دونوں ملزمان صبح سویرے واردات کررہے تھے۔
پولیس ذرائع کے مطابق کراچی کے علاقے لائنز ایریا میں خواتین سے موبائل فون چھین کر فرار ہونے والے ملزم کو شہریوں نے پکڑ کر دھنائی کردی۔
تیسرے واقعے میں نارتھ ناظم آباد حیدری میں پرائیویٹ سیکورٹی گارڈ نے فائرنگ کرکے ڈکیتی کی کوشش ناکام بنائی گارڈ کی فائرنگ سے ایک ملزم مارا گیا، جبکہ دو فرار ہونے میں کامیاب ہوگئے۔
واضح رہے کہ گزشتہ ہفتے کراچی ضلع وسطی کے علاقے بفرزون سیکٹر15اے میں گزشتہ روز عوام کے تشدد کا شکار دوسرا زخمی بھی ڈاکو دورانِ علاج دم توڑ گیا۔
پولیس کے مطابق تشدد کے شکار زخمی ڈاکو کو عباسی شہید اسپتال منتقل کیا گیا تھا۔ پولیس کا کہنا ہے کہ گزشتہ رات شہریوں نے 2 ڈاکو پکڑے تھے اور انہیں شدید تشدد کا نشانہ بنایا تھا۔
پولیس نے بتایا کہ شہریوں کے تشدد سے ایک ڈاکو موقع پر ہی ہلاک ہوگیا تھا جبکہ دوسرے کو زخمی حالت میں اسپتال منتقل کیا گیا تھا۔
