The news is by your side.

Advertisement

کراچی میں ڈاکو بے قابو، ڈکیتی کے دوران شہری پر فائرنگ

کراچی : کورنگی میں موٹر سائیکل مسلح افراد نے ڈکیتی کی واردات کے دوران براہ راست فائرنگ کردی، ملزمان لوٹ مار کے بعد با آسانی فرار ہونے میں کامیاب ہوگئے۔

تفصیلات کے مطابق کراچی شہر میں اسٹریٹ کرمنلز بے لگام ہوگئے، دن دہاڑے اور لوگوں کی موجودگی میں وارداتیں روز کا معمول بن گئیں۔

کراچی کے علاقے کورنگی گلشن محمدی میں واردات کی فوٹیج سامنے آگئی، فوٹیج میں دیکھا جاسکتا ہے کہ دو موٹرسائیکل سوار اسٹریٹ کرمنلز گلی میں موجود افراد سے لوٹ مار کررہے ہیں۔

مسلح افراد کو دیکھ کرسیڑھی پر بیٹھے افراد میں بھگدڑ مچ گئی جس پر مسلح ملزمان نے آؤ دیکھا نہ تاؤ اور براہ راست گولی چلا دی۔

ایک نوجوان کے بھاگنے کی کوشش کرنے پر ملزمان نے اُس پر بھی فائر کیا، بعد ازاں اسٹریٹ کرمنلز بلاخوف وخطر اطمینان سے لوٹ مار کے بعد وہاں سے نکل گئے۔

دوسری جانب کراچی کے علاقے سائٹ سپرہائی وے کی پولیس نے کامیاب کارروائی کرتے ہوئے ایک ملزم کو گرفتار کرکے اسلحہ برآمد کرلیا۔

ایس ایس پی ایسٹ نے میڈیا کو بتایا کہ مذکورہ ملزم نے گزشتہ دنوں اپنے ساتھیوں سمیت ڈکیتی کے دوران شہری کو فائرنگ کرکے زخمی کیا تھا۔

پولیس کے مطابق ملزمان نے فقیرا گوٹھ بلوچ محلہ میں واردات کی تھی، گرفتارملزم سے چھینی گئی موٹر سائیکل بھی برآمد کرلی گئی ہے۔

Comments

یہ بھی پڑھیں