کراچی: شہر قائد کے علاقے سائٹ ایریا میں نوجوانوں نے کرونا ایس او پیز کی خلاف ورزی کرتے ہوئے رقص کی محفل کا انعقاد کیا۔
اے آر وائی نیوز کے مطابق کراچی کے علاقے سائٹ ایریا کے میدان میں مقامی نوجوانوں نے رقص کی محفل کا انعقاد کیا، جس میں 500 سے زائد شہریوں نے شرکت کی۔
حکومتی احکامات کو ہوا میں اڑاتے ہوئے نوجوانوں نے ڈانس کی تقریب کا انعقاد کیا اور مؤقف اختیار کیا کہ حکومت نے کھلے مقام پر تقریب کی اجازت دی ہوئی ہے۔
سائٹ تھانے کی پولیس کو محفل کے بارے میں اطلاع ملی تو افسران اہلکاروں کے ہمراہ مذکورہ میدان پہنچے، جنہیں دیکھ کر شرکا فرار ہوگئے۔
پولیس نے منتظمین اور ڈانس پارٹی کے لئے بلائے گئے افراد کو حراست میں لے کر تھانے منتقل کیا جبکہ وہاں موجود سامان کو بھی قبضے میں لے لیا۔ ذرائع کے مطابق گرفتار ہونے والے افراد کے خلاف ایس او پیز کی خلاف ورزی کا مقدمہ درج کیا جائے گا۔
واضح رہے کہ سندھ حکومت نے کراچی میں کرونا کے بڑھتے ہوئے کیسز کے پیش نظر آئندہ دو ہفتوں کے لیے سخت پابندیاں عائد کیں ہیں، جس کے تحت اب رات 8 کے بجائے شام 6 بجے تمام کاروباری و تجارتی مراکز بند کردیے جائیں گے۔
