کراچی: فیڈرل بی ایریا بلاک 17 میں نامعلوم افراد کی فائرنگ سے چار افراد زخمی ہوگئے جنہیں عباسی شہید اسپتال منتقل کردیا گیا۔
تفصیلات کے مطابق کراچی کے علاقے فیڈرل بی ایریا بلاک 17 سمن آباد تھانے کی حدود میں مسلح افراد نے فائرنگ کر کے چار افراد کو زخمی کردیا اور ملزمان باآسانی فرار ہونے میں کامیاب ہوگئے۔
زخمی ہونے والے افراد کی شناخت عبد الحمید، محمد یامین، جان محمد اور مشتاق کے ناموں سے ہوئی ہے، تمام افراد کو طبی امداد کے لئے عباسی اسپتال منتقل کردیا گیا ہے، زخمیوں میں سے دو افراد کی حالت تشویشناک ہے۔
پولیس حکام کے مطابق ایک موٹر سائیکل پر سوار دو افراد نے فائرنگ کر کے چاروں افراد کو زخمی کیا،نشانہ بننے والے افراد کا تعلق مذہبی جماعت سے ہے، فائرنگ کا واقعہ فرقہ وارانہ ٹارگٹ کلنگ کا شاخسانہ معلوم ہوتا ہے تاہم تحقیقات مکمل ہونے کے بعد ہی آگاہ کردیا جائے گا۔
دوسری جانب منگوپیر اور گلبہار کے علاقوں سے دو افراد کی لاشیں برآمد ہوئی ہیں، سی ٹی ڈی نے کورنگی اور منگوپیر میں کاروائی کرتے ہوئے سیاسی جماعت کے تین ملزمان کو گرفتار کرنے کا دعویٰ کیا ہے۔
*کراچی میں بد امنی کی لہر میں تیزی
*کراچی آپریشن کے دو سال مکمل، تفصیلی رپورٹ جاری
کل کراچی آپریشن کے دو سال مکمل ہونے پر رینجرز اور پولیس کے اعلی افسران نے پریس کانفرنس کرتے ہوئے کہا ہے کہ دو سال کے دوران کراچی میں امن و امان کی صورتحال میں کافی نمایاں بہتری دیکھنے میں آئی ہے۔
