The news is by your side.

Advertisement

کراچی میں نامعلوم افراد کی فائرنگ، 2 پولیس اہلکار جاں بحق

کراچی: صوبہ سندھ کے دارالحکومت کراچی میں نامعلوم افراد کی فائرنگ سے 2 پولیس اہلکار جاں بحق ہوگئے، اہلکاروں کا تعلق سندھ ریزرو پولیس سے تھا۔

تفصیلات کے مطابق فائرنگ کا واقعہ کراچی کے علاقے اورنگی نمبر 4 میں پیش آیا۔ ایس ایس پی ویسٹ کے مطابق سندھ ریزرو پولیس سے تعلق رکھنے والے 2 اہلکار ڈیوٹی سر انجام دینے کے لیے پولیس ٹریننگ کالج (پی ٹی سی) سے نکلے۔ اہلکاروں کی ڈیوٹی مومن آباد تھانے میں تھی۔

پولیس کا کہنا ہے کہ اہلکاروں کو تھانے سے چند قدم کی دوری پر نشانہ بنایا گیا۔ 2 موٹر سائیکلوں پر سوار 4 افراد نے مقتول اہلکاروں پر نائن ایم ایم سے فائرنگ کی، جائے وقوع سے نائن ایم ایم کے 4 خول ملے ہیں۔ دونوں اہلکاروں کو 2، 2 گولیاں ماری گئیں۔

پولیس کے مطابق بظاہر واقعہ ٹارگٹ کلنگ کا نتیجہ ہے، مقتولین کے سر اور چہرے پر گولیاں ماری گئیں۔

جاں بحق اہلکاروں کی شناخت اللہ دتہ اور سپاہی احمد علی کے ناموں سے ہوئی۔ کانسٹیبل اللہ دتہ سانگھڑ اور احمد علی شہداد کوٹ کا رہائشی تھا، مقتولین اضافی نفری کے طور پر چند ماہ قبل کراچی آئے تھے۔

پولیس حکام کے مطابق دونوں اہلکار پولیس ٹریننگ سینٹر سعید آباد کی بیرکس میں رہتے تھے۔

واقعے کے بعد رینجرز اور پولیس کی بھاری نفری نے علاقے کو گھیرے میں لے لیا ہے جبکہ آس پاس کے علاقوں میں سرچنگ کا عمل بھی جاری ہے۔

Comments

comments

یہ بھی پڑھیں