کراچی گرین لائن بس حکام نے 17 رمضان المبارک سے چاند رات تک گرین لائن چلنے کے اوقات میں تبدیلی کا اعلان کیا ہے۔
گرین لائن بس حکام کے مطابق عید کی آمد قریب ہونے کے باعث مسافروں کی سہولت کیلیے بس سروس چلنے کے اوقات میں 2 گھنٹے کا اضافہ کیا گیا ہے، تاہم یہ اضافہ عارضی ہے اور صرف چاند رات تک نافذ العمل ہوگا تاکہ عید شاپنگ کیلیے آنے والے مسافروں کو پریشانی کا سامنا نہ کرنا پڑے۔
حکام نے بتایا کہ نئے عارضی شیڈول کے مطابق عبداللہ چوک سرجانی سے نمائش تک صبح 7 سے رات ساڑھے 11 تک بس سروس چلے گی جب کہ نمائش سے عبداللہ چوک تک صبح 7 سے رات ساڑھے 12 تک بس سروس فعال ہوگی۔
حکام کا مزید کہنا تھا کہ اس سے قبل گرین لائن بس سروس کے اوقات صبح 7 سے رات 10 بجے تک تھے، عید کی شاپنگ کے دوران رش کے باعث شہریوں کی آسانی کے لیے اوقات بڑھائے گئے ہیں جب کہ نمائش سے سرجانی اورسرجانی سے نمائش تک 40،40 بسیں چلائی جارہی ہیں۔
