The news is by your side.

Advertisement

کراچی میں آج بھی قیامت خیزگرمی ،پارہ43 ڈگری تک جائے گا

کراچی : شہر قائد والے تیار ہوجائیں، محکمہ موسمیات نے ہیٹ ویوالرٹ جاری کردیا اور آج بھی کراچی میں دن کے اوقات میں سمندری ہوائیں بند رہنے کا خدشہ ظاہر کر دیا ہے، آج درجہ حرارت تینتالیس ڈگری کوچھوسکتا ہے۔

تفصیلات کے مطابق کراچی میں چلچلاتی دھوپ اورگرم موسم کی روزے داروں کا برا حال کردیا ہے ، آج بھی شہر قائد میں سورج آگ برسائے گا اور پارہ 43 تک جانے کا امکان ہے۔

کراچی کا موجودہ درجہ حرارت 39 ڈگری سینٹی گریڈ اور ہوا میں نمی کا تناسب 15 فیصد ہے۔

محکمہ موسمیات نے پیش گوئی کی ہے کہ آئندہ چھ روز تک کراچی میں قیامت خیزگرمی پڑے گی، ڈائریکٹر میٹ عبدالرشید کا کہنا ہے کہ اپر سندھ میں ہوا کا کم دباؤ پیدا ہوگیا ہے، کم دباؤ کے باعث سمندری ہوا بند ہوگئی ہے، کراچی میں شمال مغرب کی جانب سے ہواچل رہی ہے، شمال مغرب سے چلنے والی والی گرم اور خشک ہوا کے نتیجے میں23 مئی تک سورج قہر ڈھائے گا، جس کے بعد بتدریج موسم بہتر ہونا شروع ہو جائے گا، بارش کا کوئی امکان نہیں۔

ڈائریکٹرمیٹ کے مطابق آئندہ 24گھنٹے مزید گرم اورخشک ہوا چلنے کا امکان ہے، شمال مغرب کی ہواؤں کے باعث لو کی کیفیت کا امکان ہے، گرمی کایہ سلسلہ بدھ تک جاری رہے گا، سمندری ہوائیں چلنے کے بعد درجہ حرارت میں کمی کا امکان ہے۔

محکمہ موسمیات نے ہیٹ ویوو الرٹ جاری کرتے ہوئے پانی اور بجلی کی فراہمی یقینی بنانے کے لیے کےالیکٹرک، پی ڈی ایم اے اوردیگرادروں کو بھی ایڈوائزری جاری کردی۔

شہر کے مختلف اسپتالوں میں بھی ہیٹ ویوو سے بچاؤ کے انتظامات کیے گئے ہیں، ڈاکٹروں کا کہنا ہے شہری غیرضروری طور پر گھر سے نکلنے سے گریز کریں ۔

گرمی کی شدت میں اضافے اور حبس کے باعث ماہرین نے شہریوں کو احتیاط کی ہدایت کی ہے۔

محکمہ موسمیات کا کہنا ہے کہ آئندہ چوبیس گھنٹے کے دوران بلوچستان کے علاقے کوئٹہ، قلات، برکھان اور تربت شدید گرمی کی لپیٹ میں رہیں گے، کراچی، حیدرآباد، میرپورخاص اور سکھر میں سورج آگ برسائے گا تاہم مالاکنڈ، ہزارہ، پشاور، کوہاٹ، راولپنڈی ڈویژن، فاٹا، اسلام آباد، کشمیر اور گلگت بلتستان میں چند مقامات پر تیزہواؤں اور گرج چمک کے ساتھ بارش کا امکان ہے۔

پنجاب کے میدانی علاقوں میں تیز اور گردآلود ہوائیں چلنے کا امکان ہے۔

گزشتہ روز سب سے زیادہ شہید بینظر آباد، چھور اور مٹھی میں پینتالیس ڈگری سینٹی گریڈ ریکارڈ کیا گیا۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں